اقمولا وبلىسى: 237 ەلدى مەكەننىڭ اتاۋى قايتارىلىپ، 110 كوشەگە جاڭا اتاۋ بەرىلدى
بۇل تۋرالى ايماق باسشىسى مالىك مىرزاليننىڭ توراعالىعىمەن مەملەكەتتىك ءتىل ساياساتىن جۇزەگە اسىرۋ، تۋريستىك سالانى دامىتۋدىڭ جول كارتاسىن تانىستىرۋ جانە سپورتتىق فەدەراتسيالار قۇرۋ ماسەلەلەرى قارالعان اپپارات ماجىلىسىندە ايتىلدى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.
اپپارات ماجىلىسىندە اقمولا وبلىسىندا مەملەكەتتىك ءتىل ساياساتىن جۇزەگە اسىرۋ جۇمىستارى قازاقستان رەسپۋبليكاسىنداعى تىلدەردى دامىتۋ مەن قولدانۋدىڭ 2011-2020 -جىلدارعا ارنالعان مەملەكەتتىك باعدارلاماسىنىڭ ءۇشىنشى كەزەڭى، ياعني 2017-2019 -جىلدارعا ارنالعان وبلىستىق ءىس- شارالار جوسپارىنا سايكەس نەگىزگى ءتورت باعىت بويىنشا جۇرگىزىلىپ كەلە جاتقاندىعى جايلى وبلىستىق تىلدەردى دامىتۋ باسقارماسىنىڭ باسشىسى مارال جاقىپوۆا بايانداپ بەردى.
وسى ورايدا، ايماق باسشىسى مالىك مىرزالين مەملەكەتتىك ءتىلدى دامىتۋ جانە اۋقىمىن كەڭەيتۋ باعىتىندا قازاق ءتىلىن بالاباقشادا، مەكتەپتە، ورتا جانە جوعارى وقۋ ورىندارىندا، سونىمەن قاتار تىلدەردى وقىتۋ ورتالىقتارىندا وقىتۋدى جەلتىلدىرۋ بويىنشا وبلىس اكىمدىگى جانىنانكەڭىستىك ورگان قۇرۋ قاجەتتىگىن اتاپ ءوتتى.
ايتا كەتۋ كەرەك، بيىلعى جىلى مەملەكەتتىك ءتىلدى يگەرۋ كورسەتكىشى وبلىس حالقىنىڭ 71 پايىزىن قۇرادى. ال مەملەكەتتىك تىلدە قاعاز اينالىمى 98,5 جەتتى.
ونوماستيكالىق كوميسسيا جۇمىسىنىڭ قورىتىندىسى بويىنشا 237 ەلدى مەكەنگە تاريحي اتاۋلارى قايتارىلسا، 110 كوشەگە جاڭا اتاۋ بەرىلدى.
مەملەكەتتىك ءتىلدى كوپشىلىكتىڭ قولدانۋىنا قول جەتكىزۋ جانە ونىڭ پايدالانىلۋ اياسىن كەڭەيتۋدىڭ ەكىنشى، قازاقستاندىقتاردىڭ تىلدىك مادەنيەتىن كوتەرۋدىڭ ءۇشىنشى جانە قازاقستان حالقىنىڭ لينگۆيستيكالىق كاپيتالىن دامىتۋدىڭ ءتورتىنشى باعىتتارى بويىنشا اتقارىلىپ جاتقان جۇمىستار مەن الداعى مىندەتتەردىڭ بارلىعى ەلباسىنىڭ «بولاشاققا باعدار: رۋحاني جاڭعىرۋ» ەڭبەگىندە ايتىلعان نەگىزگى ويلارمەن ورايلاس جۇرگىزىلەتىن بولادى.
بۇدان كەيىن وبلىس اكىمىنىڭ كەڭەسشىسى مارات يعاليەۆ اقمولا وبلىسىندا تۋريزمدى دامىتۋدىڭ 2018-2020 -جىلدارعا ارنالعان جول كارتاسى جوباسىن تانىستىردى.
ونىڭ سوزىنشە، بۇل جوبا سەگىز بلوكتان، 100 دەن استام ءىس- شارادان تۇرادى. وسى باعىتتا اعىمداعى جىلى استانا قالاسىندا «Visit Aqmola» ماركەتينگتىك كەڭسەسىن اشۋ كوزدەلگەن. وعان قوسا، كوكتەمدە وڭىردە CityPASS Burabay ءبىرىڭعاي تۋريستىك كارتاسىن ەنگىزۋ سياقتى كوپتەگەن شارالار قاراستىرىلعان.
اپپارات ماجىلىسىندە قىسقى وليمپيادا ويىندارىنا قاتىسۋشىلار جايلى جانە سپورت فەدەراتسيالارى كەڭەسىن قۇرۋ جونىندە وبلىستىق دەنە تاربيەسى جانە سپورت باسقارماسىنىڭ باسشىسى نادجەجدا پاتيۋتكينا حابارلاما جاساپ، مۇنىڭ سپورتتىڭ جەكەلەگەن تۇرلەرىن دامىتۋعا سەپتىگىنى تيگىزەرىن ايتتى. وسى ورايدا الدا قۇرىلاتىن فەدەراتسيالار جايلى اقپارات بەرىلدى.
