«بولاشاق» باعدارلاماسى بويىنشا الەمنىڭ 236 جەتەكشى ۋنيۆەرسيتەتىندە وقۋعا مۇمكىندىك بار
«كوپتەگەن قازاقستاندىق ءۇشىن «بولاشاق» باعدارلاماسى الەۋمەتتىك ساتىعا اينالدى. ويتكەنى ستيپەنديا يەگەرلەرىنە قويىلاتىن تالاپتا ەشقانداي الەۋمەتتىك ولشەمشارت جوق. باعدارلاماعا كەز كەلگەن ازامات قاتىسا الادى. قازىردىڭ وزىندە «بولاشاق» باعدارلاماسىنىڭ 11 مىڭنان استام تۇلەگى ءتۇرلى سالانىڭ، الەۋمەتتىك تاپتىڭ، ۇلتتىڭ وكىلى. باعدارلاما ەل ەكونوميكاسىنىڭ، ءومىردىڭ ءتۇرلى سالاسىنىڭ قاجەتتىلىگىنە باعىتتالعان. تاۋەلسىزدىك العان العاشقى كۇندەردەن باستاپ ەلىمىزگە ەكونوميكا مەن قارجى سالاسىنداعى ماماندار كەرەك بولدى. نارىقتىق ەكونوميكاعا كوشۋىمىزگە بايلانىستى زاڭنامانى تولىعىمەن وزگەرتۋ قاجەت ەدى. حالىقارالىق تاجىريبەسى بار جوعارى ساناتتى زاڭگەرلەر كەرەك بولدى. مەملەكەتتىك باسقارۋ ىسىندە كوپتەگەن ساپالى وزگەرىستەر جۇزەگە اسىرىلدى. قازىرگى تاڭدا تۇلەكتەردىڭ جارتىسىنان كوبى - ەكونوميكا، قارجى، قۇقىقتانۋ، مەملەكەتتىك باسقارۋ سالاسىندا جۇمىس ىستەيتىندەردى كورىپ وتىرمىز. ەندى ەكونوميكانى قايتا فورماتتايتىن ۋاقىت كەلىپ تۇر»، - دەدى حالىقارالىق باعدارلامالار ورتالىعىنىڭ جەتەكشىسى.
ونىڭ ايتۋىنشا، «بولاشاق» باعدارلاماسى ارقىلى IT، يننوۆاتسيا، ينجەنەريا، يندۋستريالىق تەحنولوگيالار سالاسىنداعى مامانداردى دايارلاۋعا باسا نازار اۋدارىلماق.
«باعدارلامانى ساپالى ىسكە اسىرۋ ءۇشىن جەتەكشى ۋنيۆەرسيتەتتەرمەن، عىلىمي ورتالىقتارمەن ىنتىماقتاستىق ورناتۋ ماڭىزدى. قازىرگى تاڭدا ءبىز حالىقارالىق رەيتينگتەردىڭ العاشقى تىزىمدەرىنە كىرەتىن 236 ۋنيۆەرسيتەتپەن جۇمىس ىستەيمىز. نەگىزگى تالاپ - ۇمىتكەردى جەكتەشى حالىقارالىق ۋنيۆەرسيتەتتەر شاقىرۋى كەرەك. ماڭىزدى قاعيداتتاردىڭ ءبىرى - اكادەميالىق ادالدىق. سوندىقتان تەستىلەۋ ناتيجەلەرىن بۇرمالاۋ نەمەسە كوشىرىپ الۋ مۇمكىندىگىن جوققا شىعاراتىن پروكتورينگ جۇيەسى جۇمىس ىستەيدى. تاعى ءبىر قاعيدات - باعدارلاما تۇلەكتەرىنىڭ ەل دامۋىنا مىندەتتى تۇردە ۇلەس قوسۋى شارت. ءار تۇلەكتىڭ ءۇش جىلدان بەس جىلعا دەيىن ەڭبەكپەن وتەۋ جونىندە مىندەتتەمەسى بار»- دەدى انۋار جانعوزين.
