ءبىلىم ءمينيسترى 2352 مەكتەپتىڭ اۋلاسىنداعى دارەتحانالاردى جابۋدى ۇسىندى

نۇر- سۇلتان. قازاقپارات – ق ر ءبىلىم جانە عىلىم ءمينيسترى اسحات ايماعامبەتوۆ قازاقستان مەكتەپتەرىندەگى دالاداعى دارەتحانالاردى جابۋدى ۇسىندى. بۇل جايىندا بالالار قۇقىعىن قورعاۋ جونىندەگى ۆەدومستۆوارالىق كوميسسيا وتىرىسىندا بەلگىلى بولدى، دەپ حابارلايدى قازاقپارات ءتىلشىسى.

 اسحات ايماعامبەتوۆتىڭ دەرەگىنشە، ەلىمىزدە دارەتحاناسى دالادا ورناتىلعان  2352 مەكتەپ بار. مۇنداي مەكتەپتەردىڭ 60 پايىزى تۇركىستان وبلىسىندا، 54,6 پايىزى الماتى وبلىسىندا، 44 پايىزى باتىس قازاقستان وبلىسىندا جانە 43 پايىزى قىزىلوردا مەن شىعىس قازاقستان وبلىستارىندا ورنالاسقان.

وسىعان وراي مينيستر ءبىلىم بەرۋ نىساندارىنا بىلىكتىلىك تالاپتارىن قايتا قاراۋدى ۇسىندى.

«قايعىلى جايتتىڭ قاشان ورىن الاتىندىعىن كۇتۋدىڭ قاجەتى جوق (...). بىزگە ءبىلىم بەرۋ نىساندارىنا قويىلاتىن بىلىكتىلىك تالاپتارىن قايتا قاراپ، سانيتارلىق ەرەجەلەر مەن نورمالاردا دالاداعى دارەتحانالار مۇلدەم بولماۋى تيىستىگى جازىلۋ ءۇشىن دەنساۋلىق ساقتاۋ مينيسترلىگىنە جۇگىنۋ قاجەت شىعار. مۇنداي جاعدايدا جەرگىلىكتى اتقارۋشى ورگاندار مەكتەپ ليتسەنزياسى بولۋى ءۇشىن، مەكتەپ جۇمىسىن ودان ارى جالعاستىرۋى ءۇشىن شىنىمەن دە شىنايى شارالار قابىلداۋعا ءماجبۇر بولادى»، - دەدى ا. ايماعامبەتوۆ.

وسى رەتتە ول بۇل ماسەلەگە قاتىستى ناقتى جول كارتاسى بولۋى تيىستىگىن ايتتى.

«ءبىر كۇننىڭ ىشىندە ەشكىم دە جىلى دارەتحانا سالا المايدى. شالعايدا ورنالاسقان ەلدى مەكەندەر بار. دەگەنمەن، پروبلەمانى شەشۋ قاجەت»، - دەدى ول.

ەسكە سالا كەتسەك، تارازداعى مەكتەپتەردىڭ بىرىندە دالاداعى دارەتحاناعا سۇرانىپ شىققان وقۋشى قىزعا 38 جاستاعى ەر ادام سەكسۋالدىق زورلىق- زومبىلىق كورسەتتى. 15 - قاراشادا كۇدىكتى قولعا ءتۇستى.

وسى وقيعادان كەيىن جامبىل وبلىسىنداعى بارلىق ءبىلىم وردالارىنداعى قاۋىپسىزدىك شارالارى كۇشەيتىلدى. ال، زارداپ شەككەن وقۋشى اۋرۋحاناعا جاتقىزىلدى.

اۆتور: مارلان جيەمباي