ماڭعىستاۋلىقتار 233 مىڭ رەت جەدەل جاردەم شاقىرعان
شۇعىل مەديتسينالىق كومەك كورسەتۋدىڭ ەكى دەڭگەيلى مودەلىن ەنگىزۋ ناتيجەسىندە پاتسيەنتكە جەتۋ ۋاقىتى ايتارلىقتاي قىسقارعان. بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا ماڭعىستاۋ وبلىستىق جەدەل جاردەم ستانتسياسىنىڭ ديرەكتورى راقىمجان ەلتايەۆ ءمالىم ەتتى.
2019 -جىلدىڭ شىلدە ايىندا ناۋقاسقا كەلۋ ۋاقىتى بىلتىرعى جىلمەن سالىستىرعاندا 25 تەن 18 مينۋتقا دەيىن قىسقارعان.
«شۇعىل مەديتسينالىق كومەك كورسەتۋدىڭ حالىقارالىق ستاندارتتارىن ەنگىزۋ جالعاستىرىلدى. وسىلايشا، 2019 -جىلدىڭ ون ايىندا مەديتسينالىق كومەك كورسەتۋ ساپاسىن ارتتىرۋ پارامەترى - ءساتتى رەانيماتسيا كورسەتكىشى %20,9 ارتتى، 2018 -جىلى ول %15 قۇرادى. 2017 -جىلمەن سالىستىرعاندا بيىلعى ون ايدا ءولىم جاعدايلارى 245 وقيعاعا تومەندەدى»، - دەدى ر. ەلتايەۆ.
جۇرگىزىلگەن جاڭعىرتۋدىڭ تاعى ءبىر ناتيجەسى سوزىلمالى اۋرۋلارى بار ناۋقاستارمەن ەمحانالار جۇمىسىنىڭ جاقسارۋى. بۇل تۋرالى سوزىلمالى اۋرۋلاردىڭ اسقىنۋى سەبەبىنەن جەدەل جاردەمدى شاقىرۋ جاعدايلارىنىڭ سانىنىڭ تومەندەۋى دالەل. جىل باسىمەن سالىستىرعاندا جەلتوقسان ايىنىڭ سوڭىندا مۇنداي شاقىرتۋلار سانى 55410 وقيعاعا قىسقارعان.
«103 قىزمەتتىڭ ماتەريالدىق- تەحنيكالىق بازاسى كۇشەيتىلدى. 2018 -جىلمەن سالىستىرعاندا 2019 -جىلدىڭ قورىتىندىسى بويىنشا مەديتسينالىق جابدىقتارمەن قامتۋ %20 ارتىپ، %70 قۇرادى. 2017-2018 -جىلدارمەن سالىستىرعاندا GPS- ناۆيگاتسيامەن جابدىقتاۋ جاعدايى جاقساردى. كورسەتكىش 2018 -جىلمەن سالىستىرعاندا %21,2 ارتتى جانە 2019 -جىلدىڭ ون ايىنىڭ ناتيجەسىندە %73,2 قۇرادى. سونداي- اق سانيتارلىق كولىكپەن قامتاماسىز ەتۋ ارتتى: بيىلعى ون ايدىڭ قورىتىندىسى بويىنشا ول %75 قۇرادى» - دەدى ول.
سونداي- اق ماڭعىستاۋ وبلىستىق جەدەل جاردەم ستانتسياسىنىڭ ديرەكتورى راقىمجان ەلتايەۆ جەدەل مەديتسينالىق قىزمەت سالاسىنداعى پروبلەمالى ماسەلەلەردى اتادى.
ونىڭ ىشىندە سانيتارلىق اۆتوكولىكتەردىڭ جەتكىلىكسىزدىگى، بريگادانىڭ كەلۋ ۋاقىتىن ۇزارتاتىن ساپاسىز جولدار، كوشەدە جارىق شامدارىنىڭ، كوشە اتاۋلارىنىڭ، ءۇي نومىرلەرىنىڭ بولماۋى جەدەل جاردەم بريگاداسىنىڭ جۇمىسىن قيىنداتادى.
«پاتەرلەردە دوموفوندار جۇمىس ىستەمەيدى. الىس اۋداندار، وبلىس بويىنشا ينتەرنەتتىڭ جوقتىعى دا ءبىر كەدەرگى. سونداي-اق، جۇرگىزۋشىلەر جول ادەبىن، ەرەجەلەردى ساقتامايدى. سوندىقتان جول- كولىك وقيعالارى ءجيى بولادى. سانيتارلىق اۆتوكولىكتىڭ جەتكىلىكسىز سانى (قاجەتتىلىك 50 بىرلىك) - مەديتسينالىق جابدىقتارمەن جابدىقتالماۋى (%60) دا بار»، - دەيدى راقىمجان ەلتايەۆ.
اۆتور: ءلايلىم ءالىم
