سوڭعى ءۇش جىلدا 2323 شەتەلدىك قازاق جاستارى ەلىمىزدە ارنايى گرانتپەن جوعارى وقۋ ورىندارىنا قابىلداندى
بۇگىن ماجىلىستە كوشى-قون ۇدەرىستەرىنە ارنالعان دوڭگەلەك ۇستەل بارىسىندا ءبىلىم جانە عىلىم ۆيتسە-ءمينيسترى تاحير بالىقبايەۆ وسىلاي ايتتى.
«ەلىمىز تاۋەلسىزدىك العان كەزدەن باستاپ، شەتەلدەگى قانداستارىمىزدىڭ قامى ۇنەمى ۇكىمەت نازارىندا بولعانى، جالپى كوشى-قون ماسەلەسى مەملەكەتتىك ساياساتتىڭ دەڭگەيىنە كوتەرىلگەنى بارشاعا ايان. ۇلتتىق مۇددە جانە كەلەشەك ۇرپاق ءۇشىن تاۋەلسىز ەلىمىزدىڭ ءتورت قۇبىلاسىن تۇگەندەۋ تۇرعىسىندا جاسالىپ جاتقان وسى يگى شاراعا ءبىلىم سالاسى دا اتسالىسىپ كەلە جاتىر»، - دەيدى ۆيتسە-مينيستر.
ونىڭ ايتۋىنشا، جوعارى ءبىلىم بەرۋ سالاسىنداعى مەملەكەتتىك ءبىلىم بەرۋ گرانتتارىنىڭ 2 پايىزى ارنايى كۆوتا رەتىندە قازاق دياسپوراسىنىڭ وكىلدەرىنە ءبولىنىپ وتىر. وسى 2 پايىزدىق كۆوتا بويىنشا سوڭعى ءۇش جىلدا 2 مىڭ 323 قازاق جاستارى ءبىلىم گرانتىنىڭ نەگىزىندە وقۋعا قابىلدانعان. وقۋعا قابىلدانعانداردىڭ باسىم كوپشىلىگى وزبەكستان، قىتاي، موڭعوليا ەلدەرىنە تيەسىلى.
«مەملەكەتتىك ءبىلىم بەرۋ تاپسىرىسىنىڭ نەگىزىندە وقيتىن قازاق دياسپوراسىنىڭ وكىلدەرى تەگىن جاتاقحانامەن، شاكىرتاقىمەن، جىلىنا ەكى رەت بەرىلەتىن جول ءجۇرۋ اقىسىمەن قامتاماسىز ەتىلەدى»، - دەيدى ت. بالىقبايەۆ.
ۆيتسە-ءمينيستردىڭ سوزىنە قاراعاندا، شەتەلدەگى قازاق جاستارى ءۇشىن جوعارى وقۋ ورىندارى جانىنان دايىندىق كۋرستارى دا اشىلىپ جاتىر. ال مۇنداي كۋرستار نەگىزىنەن ءال-فارابي، وڭتۇستىك قازاقستان ۋنيۆەرسيتەتتەرىندە بولىپ كەلسە، بيىلدان باستاپ سولتۇستىك جانە شىعىس قازاقستان وبلىستارىنداعى وقۋ ورىندارىنا دا بولىنە باستادى.
«بۇل نەگىزىنەن ەڭبەك رەسۋرستارى ونسىز دا ارتىق وڭىرلەردەن بولەك، قايتا وسىنداي رەسۋرستارى تاپشى وڭىرلەرگە ماماندار تارتۋعا قاتىستى بولىپ تابىلادى»، - دەد ت. بالىقبايەۆ.
اۆتور: قانات مامەتقازى ۇلى
