ورداباسى اۋدانىندا قويشى وزىنە سەنىپ تاپسىرىلعان 230 دان استام مالدى ساتىپ جىبەرگەن
بۇل تۋرالى تۇركىستان وبلىسى پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات. دەپارتامەنت تاراتقان مالىمەتتەرگە قاراعاندا، ورداباسى اۋداندىق پوليتسيا بولىمىنە جەرگىلىكتى تۇرعىن ارىزدانعان.
ەر ادامنىڭ ايتۋىنشا، ول ءوزى باسقارىپ وتىرعان جايىلىمدىق جەردەگى قويشىعا اسىل تۇقىمدى مالدارىن سەنىپ تاپسىرعان. الايدا، مال باسىن تۇگەندەۋگە بارعاندا، ولاردىڭ تولىق ەمەس ەكەندىگىن بايقاعان. وسىلايشا جابىرلەنۋشىگە كەلگەن شىعىن كولەمى 16380000 تەڭگە. اتالعان جايتتى پوليتسيا قىزمەتكەرلەرى ق ر ق ك-نىڭ 189-بابى «سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان- تاراجعا سالۋ» بويىنشا تىركەۋگە الدى.
حابار كەلىپ تۇسكەن بويدا ءتارتىپ ساقشىلارى وقيعا ورنىنا شۇعىل شىقتى. پوليتسيا اتالمىش قىلمىسقا كۇدىكتى رەتىندە جابىرلەنۋشىنىڭ قوي باعىپ جۇرگەن جۇمىسشىسىن ۇستادى. ول ارىس اۋدانىنىڭ تۇرعىنى بولىپ شىقتى. انىقتالعانداي، سەزىكتى ەر ادام 2021 -جىلدان بەرى 230 دان استام ۇساق مالدى 4-5-ەۋدەن ساتىپ وتىرعان، اقشاسىن جاراتىپ جىبەرگەن. قازىرگى تاڭدا كۇدىكتى قاماۋعا الىنىپ، وعان قاتىستى سوتقا دەيىنگى تەرگەۋ امالدارى جۇرگىزىلۋدە. پوليتسيا قىزمەتكەرلەرى وقيعانىڭ تولىق ءمان-جايىن انىقتاۋعا كىرىستى.
«تۇركىستان وبلىسىنىڭ پوليتسەيلەرى تۇرعىندارعا مالدارىن بەيتانىس ادامدارعا باقتىرماۋعا كەڭەس بەرەدى. سونداي-اق، مۇمكىندىگىنشە مالدى تاڭبالاپ، سىرعالاپ، ەن سالدىرۋ كەرەك»، - دەلىنگەن حابارلامادا.
