شامامەن 2300 ادام قازاقستاننان تۇركياعا ۇشا الماي وتىر - ي د م

استانا. قازاقپارات - تۇركياداعى جاعدايعا بايلانىستى، استانا، الماتى، اقتاۋ، قاراعاندى جانە ورال قالالارىنان، بارلىعى 13 رەيس كەيىنگە شەگەرىلدى.

ۇشا الماي قالعان جولاۋشىلار سانى شامامەن 2300 ادام.

بۇل تۋرالى جۋرناليستەرگە شۇعىل بريفينگ وتكىزگەن ق ر ينۆەستيتسيالار جانە دامۋ ۆيتسە- ءمينيسترى بەرىك قاماليەۆ ءمالىم ەتتى.

«تۇركياداعى جاعدايعا بايلانىستى، ءبىز استانا، الماتى، اقتاۋ، قاراعاندى جانە ورال قالالارىنىڭ اۋەجايىنان 13 رەيستى كەيىنگە شەگەردىك. ۇشا الماي قالعان جولاۋشىلاردىڭ سانى شامامەن 2300 ادام. ەير استانا جانە سكات اۋە كومپانيالارىنىڭ توعىز رەيسى مەن ءتورت تۇركيالىق اۋە تاسىمالداۋشىنىڭ رەيستەرى كەشىكتىرىلدى»، - دەپ حابارلادى ب. قاماليەۆ.

ۆيتسە-ءمينيستردىڭ ايتۋىنشا، سىرتقى ىستەر مينيسترلىگىمەن كەڭەس وتكىزگەن ازاماتتىق اۆياتسيا كوميتەتى ازىرگە كەشكى ساعات 19.00 گە دەيىنگى رەيستەردى كەيىنگە قالدىرعان.

«قازىر سىرتقى ىستەر مينيسترلىگىمەن اقىلداسا وتىرىپ، الدىن الا ساعات كەشكى 19.00 گە دەيىنگى رەيستەردى تولىق شەگەردىك. ساعات 16.00 دە جاعدايدى قوسىمشا باياندايمىز»، - دەدى ب. قاماليەۆ.

ەستەرىڭىزگە سالا كەتەيىك، 16 -شىلدەگە قاراعان ءتۇنى تۇركيادا اسكەري توڭكەرىس ارەكەتى جاسالعان.

اۆتور: كەنجەكەي توقتامۇرات قىزى