23-تامىزدا قانشا سايلاۋ ۋچاسكەسى جۇمىس ىستەيدى
استانا. KAZINFORM - ورتالىق سايلاۋ كوميسسياسىنىڭ مۇشەسى ازامات ايماناقۇموۆ ق ر قۇرىلتايىنىڭ دەپۋتاتتارىن سايلاۋدا داۋىس بەرۋ ءتارتىبىن ايتىپ بەردى.
- داۋىس بەرۋ 10423 سايلاۋ ۋچاسكەسىندە وتەدى. ونىڭ ىشىندە 61 شەت مەملەكەتتەردەگى قازاقستان رەسپۋبليكاسىنىڭ وكىلەتتىكتەرى جانىندا قۇرىلعان 79 سايلاۋ ۋچاسكەسى بار، - دەدى ول ورتالىق سايلاۋ كوميسسياسىنىڭ وتىرىسىندا.
سونىمەن بىرگە، سايلاۋشىلاردىڭ تىركەلگەن ورنى بويىنشا قۇرىلعان سايلاۋ ۋچاسكەلەرىندە داۋىس بەرۋ تاڭعى 07:00 دەن كەشكى 20:00 گە دەيىن جۇرگىزىلەدى. الايدا كەي ۋچاسكەلەردە وزگەشەلىكتەر بولۋى مۇمكىن.
- اسكەري بولىمدەردە، شالعاي جانە قاتىناسۋ قيىن اۋدانداردا، شالعايداعى مال شارۋاشىلىعى ۋچاسكەلەرىندە، ۇزدىكسىز جۇمىس ىستەيتىن ءوندىرىسى بار ۇيىمداردا، دەمالىس ۇيلەرىندە، ساناتوريلىك-كۋرورتتىق ۇيىمداردا، ستاتسيونارلىق جاعدايدا ەمدەلىپ جاتقان، جۇمىستى ۆاحتالىق ادىسپەن ۇيىمداستىرۋ ورىندارىندا قوعامنان ۋاقىتشا وقشاۋلاۋدى قامتاماسىز ەتەتىن ارناۋلى مەكەمەلەردە، ق ر شەت مەملەكەتتەردەگى وكىلەتتىكتەرى جانىندا قۇرىلعان سايلاۋ ۋچاسكەلەرىندە ەگەر تىزىمگە ەنگىزىلگەن بارلىق سايلاۋشى داۋىس بەرسە، ۋچاسكەلىك سايلاۋ كوميسسياسى كەز كەلگەن ۋاقىتتا داۋىس بەرۋدى اياقتالدى دەپ جاريالاي الادى. مۇنداي ۋچاسكەلەردىڭ سانى – 625، - دەدى ق ر ورتالىق سايلاۋ كوميسسياسىنىڭ مۇشەسى.
ايتا كەتەيىك، بۇعان دەيىن قۇرىلتاي سايلاۋىن 777 حالىقارالىق بايقاۋشى باقىلايتىنىن جازعانبىز.
