الماتىدا 23 جاستاعى جىگىتكە قارسى 66 قىلمىستىق ءىس قوزعالدى

ىشكى ىستەر ورگانىنىڭ مالىمەتىنشە، الاتاۋ اۋدانىندا قازىر 23 جاستاعى جىگىتكە قارسى 66 قىلمىستىق ءىس قوزعالعان.

«ەر ادام ساقتاندىرۋ كومپانياسىنىڭ اگەنتى ەكەندىگى انىقتالدى. الايدا، ول قىزمەتىن اسىرا پايدالانىپ، جالعان ساقتاندىرۋ بلانكتەرىن دە ساتىپ كەلگەن. سۇراق-جاۋاپ كەزىندە ول اتالعان بلانكىلەردى ج. ەسىمدى ازاماتتان العانىن ايتتى. سايكەسىنشە، بۇل قاعازدار ساقتاندىرۋ كومپانياسىنىڭ ەسەبىندە تىركەلمەگەن. جالعان پوليستەردى ونداعان جۇرگىزۋشى ساتىپ العان. ال، ولار ءوز كەزەگىندە الاياققا ۇرىنعاندىعىن اڭعارماعان»، - دەدى الاتاۋ اۋداندىق ءى ءى ب باسشىسى باقىت قاسابەكوۆ.

اۋداندىق ءى ءى ب- دا مالىمدەگەندەي، ءبىراز ۋاقىتتان سوڭ زاڭ ورگاندارىنا شيكىلىكتى اڭعارعان ساقتاندىرۋ كومپانياسى مەن بىرنەشە اۆتوكولىك يەلەرى شاعىمدانىپ كەلدى. قازىرگى تاڭدا اتالعان دەرەك بويىنشا ق ر ق ك 190-بابىنىڭ 2-تارماعى بويىنشا قىلمىستىق ءىس قوزعالدى.

تەرگەۋ امالدارى جالعاسىپ جاتىر.

اۆتور: گۇلميرا عوسمانالي