جارتى جىل ىشىندە قازاقستاندا 23 حالىقارالىق جانە 40 ايماقتىق ەسىرتكى كانالدارى جويىلدى
مەملەكەت باسشىسى ۇلتتىق قاۋىپسىزدىك ورگاندارىنىڭ ەكى مىڭىنشى جىلدارى تەرروريزم مەن راديكالدى ءدىني ەكسترەميزمگە قارسى كۇرەسكە قوسقان ۇلەسىنە توقتالدى.
سونداي-اق سىرتقى بارلاۋ قىزمەتىنىڭ ۇلتتىق مۇددەنى قورعاۋ جولىندا ءوز مىندەتىن تابىستى ورىنداپ كەلە جاتقانى جانە كوميتەتتىڭ «ا» ارناۋلى قىزمەتى مەن شەكارا قىزمەتىنىڭ جۇمىستارى تۋرالى ايتتى.
- جىل باسىنان بەرى كوميتەت قىزمەتكەرلەرىنىڭ ءتيىمدى جۇمىسىنىڭ ارقاسىندا ەكسترەميستىك ارەكەتتەرگە قاتىسقان جانە تەرروريزمدى ناسيحاتتاعان 42 ادام ۇستالدى. ەكى تەررولىق اكتىنىڭ الدىن الدى. ۇيىمداسقان قىلمىسقا قارسى كۇرەس قارقىندى جۇرگىزىلۋدە. ۇلتتىق قاۋىپسىزدىك ورگاندارى پوليتسيامەن بىرلەسىپ، ءبىرقاتار اسا قاۋىپتى قىلمىستىق توپتى قۇرىقتادى، بانديتتىك ۇيىمداردىڭ 22 مۇشەسى تۇتقىندالدى. ناتيجەسىندە 700 گە جۋىق قارۋ-جاراق، 54 گراناتا، 17 مىڭنان استام وق-ءدارى تاركىلەندى. جارتى جىلدىڭ ىشىندە ەلىمىزدە 15 ەسىرتكى لابوراتورياسى، 23 حالىقارالىق جانە 40 ايماقتىق ەسىرتكى كانالدارى جويىلدى، 3 ەسىرتكى پلانتاتسياسى اشكەرەلەندى. شەتەلدىك سەرىكتەستەرمەن بىرلەسىپ، حالىقارالىق ەسىرتكى تاسىمالىنا قارسى كۇرەس اياسىندا 14 حالىقارالىق ارنايى وپەراتسيا جۇزەگە اسىرىلدى، - دەدى قاسىم-جومارت توقايەۆ.
سونىمەن قاتار پرەزيدەنت ۇلتتىق قاۋىپسىزدىك كوميتەتى قىزمەتىنىڭ ءمان-ماڭىزىنا توقتالا كەلە:
- ۇلتتىق قاۋىپسىزدىك جۇيەسى - مەملەكەتتىگىمىزدىڭ باستى تۇعىرى. سونداي-اق، دەربەس دامۋىمىزدىڭ مىزعىماس تىرەگى. وتان ءۇشىن ايانباي ەڭبەك ەتىپ جۇرگەن ازاماتتاردىڭ ارقاسىندا ەلىمىز ءوسىپ- وركەندەۋدە. سىزدەر ىشكى جانە سىرتقى ءقاۋىپ- قاتەرلەرگە دەر كەزىندە تويتارىس بەرىپ كەلەسىزدەر. بۇگىندە مەملەكەتتىڭ نەگىزى جانە كونستيتۋتسيالىق قۇرىلىمى بەرىك قورعالعان. تاۋەلسىزدىگىمىزدىڭ قۇندىلىقتارى بىرنەشە رەت ەلەۋلى سىن-قاتەرلەرگە تاپ كەلدى. سىزدەر بەيبىتشىلىك پەن كەلىسىمدى ساقتاۋ ءۇشىن تاباندى ەڭبەك ەتتىڭىزدەر، - دەدى پرەزيدەنت.
ايتا كەتەيىك، جيىندا مەملەكەت باسشىسى ۇ ق ك ورگاندارىنىڭ ارداگەرلەرىن، وفيتسەرلەرى مەن قىزمەتكەرلەرىن قۇتتىقتاپ، ولاردىڭ قازاقستان مەملەكەتتىگىن نىعايتۋعا قوسقان ۇلەسىن اتاپ ءوتتى.
