بۇگىن 23- قىسقى وليمپيادا ويىندارىنىڭ باستالۋىنا 2 كۇن قالدى

پحەنچحان. قازاقپارات - وڭتۇستىك كورەيادا وتەتىن XXIII قىسقى وليمپيادا ويىندارىنىڭ باستالۋىنا تۋرا 2 كۇن قالدى، دەپ حابارلايدى قازاقپارات ءتىلشىسى.

پحەنچحان قالاسى وليمپيادا ويىندارىن وتكىزۋ ءۇشىن بارلىق جاعدايدى جاساپ ۇلگەرگەن. بۇگىنگى تاڭدا الەمنىڭ ءار تۇكپىرىنەن كەلگەن سپورتشىلار مەن قوناقتار قالاعا ورنالاسىپ ۇلگەرگەن. سەبەبى، اقپاننىڭ 1 -كۇنى وليمپيادا ويىندارىن ۇيىمداستىرۋ كوميتەتى بارلىق سپورت تۇرلەرىنەن سپورتشىلاردى تىركەۋدى اياقتاعانىن جاريالاعان بولاتىن.

جالپى قىسقى ويىندارعا 92 ۇلتتىق وليمپيادا كوميتەتىنەن 2295 سپورتشى تىركەۋدەن وتكەن. وڭتۇستىك كورەيانىڭ وزىنەن 15 سپورت ءتۇرى بويىنشا 144 سپورتشى مەدالعا تالاسادى. ال سولتۇستىك كورەيادان ءتورت جىلدىق دوداعا 5 سپورت تۇرىنەن 22 سپورتشى قاتىساتىنى بەلگىلى بولدى. سونىمەن قاتار پحەنچحان وليمپياداسىنا 6 مەملەكەت تۇڭعىش رەت قاتىسقالى وتىر. ولار - ەكۆادور (شاڭعىمەن سىرعاناۋ)، ەريترەيا (ءالپى شاڭعىمەن سىرعاناۋ)، كوسوۆو (ءالپى شاڭعىمەن سىرعاناۋ)، مالايزيا (فيگۋرالىق كونكي)، نيگەريا (بوبسلەي جانە سكەلەتون) جانە سينگاپۋر (Short Track Skating) سپورتشىلارى.

ەستەرىڭىزگە سالا كەتەيىك، قازاقستان سپورتشىلارى وليمپياداعا 57 جولداما جەڭىپ العان بولاتىن. ولار سپورتتىڭ 9 تۇرىنەن سىنعا تۇسەدى. اق وليمپيادانىڭ رەسمي اشىلۋ سالتاناتى 9 -اقپاندا، ال جابىلۋ كەشى 25 -اقپانعا جوسپارلانعان.

كۇنسۇلتان وتارباي