قىسقى 23- وليمپيادا ويىندارىنىڭ باستالۋىنا 100 كۇن قالدى

استانا. قازاقپارات - 2018 -جىلى وڭتۇستىك كورەيانىڭ پحەنچحان قالاسىندا وتەتىن XXIII قىسقى وليمپيادا ويىندارىنا 100 كۇن قالدى، دەپ حابارلايدى قازاقپارات ۇلتتىق وليمپيادا كوميتەتىنە سىلتەمە جاساپ.

ق ر ۇلتتىق وليمپيادا كوميتەتىنىڭ (ۇ و ك) حابارلاۋىنشا، 1 -قاراشا كۇنى 19:00-دە استانا قالاسى اكىمدىگىمەن بىرلەسىپ ەل وردادا «وليمپياداويىندارىنا دەيىن 100 كۇن» اكسياسىن وتكىزەدى. شارانىڭ باستى ماقساتى وليمپيادادا ەل نامىسىن قورعايتىن وتاندىق سپورتشىلاردى قولداۋ.

ايتا كەتەرلىگى، وڭتۇستىك كورەيا 2018 -جىلعى قىسقى وليمپيادا ويىندارىن وتكىزۋ مارتەبەسىن 2011 -جىلدىڭ 6 -شىلدە حالقارالىق وليمپيادا كوميتەتىنىڭ دۋربانداعى 123- سەسسياسىندا جەڭىپ الدى. بۇل كورەيا رەسپۋبليكاسىنىڭ العاشقى، ازيا قۇرلىعىندا ءۇشىنشى قىسقى وليمپيادا ويىندارى بولىپ وتىر. ال بۇعان دەيىن جاپونيانىڭ ساپپورو (1972) مەن ناگانو (1998) قالالارى ەكى رەت قىسقى وليمپيادا ويىندارىن قابىلداعان ەدى.

پحەنچحان قىسقى وليمپيادانى وتكىزۋگە ءۇش رەت ءوتىنىش ءبىلدىرىپ، 2010 -جىلى ۆانكۋۆەرگە جانە 2014 -جىلى سوچي قالاسىنا جول بەردى.

2018 -جىلعى وليمپيادا ويىندارىنا 95 ۇلتتىق وليمپيادالىق كوميتەتتىڭ اتىنان 2 900 سپورتشى قاتىسادى دەپ كۇتىلۋدە. سونداي- اق، قىسقى سپورتتىڭ 15 تۇرىنەن جالپى 102 مەدال جيىنتىعى ساراپقا سالىنادى.

ەسكە سالا كەتەيىك، XXIII قىسقى وليمپيادا ويىندارى الاۋى 2018 -جىلى 9 -اقپان كۇنى پحەنچحان قالاسىندا تۇتانادى. الەم دوداسى 25 اقپانعا دەيىن جالعاسادى.

 اۆتور: مۇحتار قاليموللا ۇلى