ءبىلىم گرانتى كونكۋرسىنا ءوتىنىش قابىلداۋ مەرزىمى 22- شىلدەگە دەيىن ۇزارتىلدى

نۇر-سۇلتان. قازاقپارات - تالاپكەرلەردىڭ ءوتىنىشىن ەسكەرە وتىرىپ، ءبىلىم گرانتتارى كونكۋرسىنا ءوتىنىم قابىلداۋ مەرزىمى 22- شىلدەنى قوسا العاندا 2 كۇنگە ۇزارتىلدى، دەپ حابارلايدى قازاقپارات.

بۇگىنگى تاڭدا شەكتى مەجەدەن وتكەن 103 مىڭ تالاپكەردىڭ 80 مىڭنان استامى جوعارى وقۋ ورىندارىنىڭ قابىلداۋ كوميسسياسىنا قۇجات تاپسىرعان.

وتكەن جىلمەن سالىستىرعاندا 88 مىڭ ۇمىتكەر شەكتى دەڭگەيدەن اسقان بولسا، گرانتتىق بايقاۋعا 77 مىڭ ادام قاتىسقان.

وسى كورسەتكىشتى ەسكەرە وتىرىپ، بيىل 92 مىڭ ءوتىنىش قابىلدانادى دەپ كۇتىلىپ وتىر.

مەملەكەتتىك ءبىلىم گرانتىن تاعايىنداۋ كونكۋرسىنا قاتىسۋ ءۇشىن تالاپكەرلەرگە مىناداي قۇجاتتار قاجەت:

جەكە كۋالىك، ۇ ب ت سەرتيفيكاتى، ورتا ءبىلىمى تۋرالى اتتەستات (ت ج ك ب ۇيىمدارىنىڭ تۇلەكتەرى ءۇشىن ديپلوم) جانە جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار.

مەديتسينالىق انىقتامانى تامىز ايىندا ۋنيۆەرسيتەتكە قابىلداۋ كەزىندە تاپسىرۋ قاجەت.