استانالىق 22 جۇرگىزۋشى ءومىر بويى كولىك جۇرگىزۋ قۇقىعىنان ايىرىلۋى مۇمكىن

بۇل تۋرالى قالالىق پوليتسيا دەپارتامەنتى انىقتاۋ باسقارماسىنىڭ باستىعى دياس توقاتوۆ، دەپ حابارلايدى قازاقپارات ءتىلشىسى.
قۇقىق قورعاۋ سالاسىنىڭ وكىلى جىل باسىنان بەرى ەلوردا اۋماعىندا بولعان جول-كولىك وقيعالارىنا بايلانىستى قوزعالعان قىلمىستىق ىستەر تۋرالى مالىمەت بەردى.
«بيىلدىققا پوليتسيا قىزمەتكەرلەرى 430 ماس جۇرگىزۋشىنى انىقتادى. ونىڭ ىشىندە 408 جۇرگىزۋشى 15 تاۋلىككە قاماۋعا الىنىپ، اكىمشىلىك جاۋاپكەرشىلىككە تارتىلدى. ال 22 جۇرگىزۋشىگە قاتىستى وسىنداي بۇزۋشىلىق جاساعانى ءۇشىن قىلمىستىق كودەكستىڭ 346-بابى بويىنشا قىلمىستىق ءىس قوزعالىپ، ۋاقىتشا ۇستاۋ يزولياتورىنا قامالدى. ياعني، بۇل ادامدار كولىك جۇرگىزۋ قۇقىنان ايىرىلعاندارىنا قاراماستان، ماس كۇيدە كولىك جۇرگىزگەن. ولار تۇتقىندالىپ، قاماۋعا الىندى»، - دەدى دياس توقاتوۆ.
وسى وقيعالار بويىنشا نۇر-سۇلتان قالاسى مامانداندىرىلعان اۋدانارالىق تەرگەۋ سوتىنىڭ ۇكىمىمەن 12 ادامعا قاتىستى «كۇزەتپەن ۇستاۋ»، 10 ادامعا قاتىستى «ءۇيقاماق» تۇرىندەگى بۇلتارتپاۋ شارالارى تاعايىندالعان.
«سوندا ءۇش ايدىڭ ىشىندە 22 قىلمىستىق ءىستى سوتقا جولدادىق. قىلمىستىق كودەكستىڭ 346-بابى بويىنشا ولاردى ءومىر بويى كولىك جۇرگىزۋ قۇقىعىنان ايىرۋ جازاسى كۇتىپ تۇر»، - دەدى باسقارما باستىعى.
اۆتور: ەسىمجان ناقتىباي