بولجامعا سايكەس بيىل 22 ميلليون توننا استىق باستىرىلادى
شارا بارىسىندا 2016-جىلدىڭ ەگىن جيناۋ ناۋقانى كورسەتىلىپ، ق ر اۋىل شارۋاشىلىعىنىڭ ءبىرىنشى ۆيتسە-ءمينيسترى قايرات ايتۋعانوۆ ءسوز سويلەدى.
«اعىمداعى جىلى اۋىل شارۋاشىلىعى داقىلدارىنىڭ ەگىس القابى شامامەن 21,7 ميلليون گەكتاردى قۇرادى. بۇل وتكەن جىلعى كولەمنەن 445,1 مىڭ گەكتارعا ارتىق. جالپى ەگىس القاپتارىنىڭ ولشەمىندە ءداندى داقىلداردىڭ ۇلەسى 15,4 ميلليون گەكتار، مايلى داقىلدار 2,0 ميلليون گەكتار، باقشالىق ونىمدەر مەن كارتوپ 426,7 ميلليون گەكتار» ، - دەپ اتاپ ءوتتى ق. ايتۋعانوۆ.
ونىڭ ايتۋىنشا، قانت قىزىلشاسى 12,9 مىڭ گەكتار، ماقتا 109,6 مىڭ گەكتار اۋماققا ەگىلگەن. بۇگىندە ەلىمىزدىڭ بارلىق ايماعىندا جاپپاي ەگىن ورۋ ناۋقانى ءجۇرىپ جاتىر. ايتالىق، 15- قىركۇيەكتەگى جاعداي بويىنشا 9667,1 مىڭ گەكتار القاپ ورىلىپ، 14,4 ميلليون توننا ءونىم باستىرىلدى.
ەلىمىزدىڭ استىقتى وبلىستارىندا (قوستاناي وبلىسى، اقمولا وبلىسى، س ق و) 7 ميلليون گەكتاردان اسا اۋماق ورىلدى جانە دە جيناۋ ناۋقانى جالعاستىرىلۋدا.
قازىرگى تاڭدا اۋىلشارۋاشىلىعى وندىرۋشىلەرى 290,4 مىڭ توننا جانار-جاعارمايدى پايدالانۋدا. جالپىلاي العاندا، كۇزدىك استىق باستىرۋ جۇمىستارىنا 391,6 مىڭ توننا جانار-جاعارماي جۇمساۋ جوسپارلانعان.
«قازاگرو» حولدينگىنىڭ نەسيە رەسۋرستارىنا 2016-جىلى 6,8 ميلليون گەكتار الاڭدا كوكتەمگى ەگىس جانە جيناۋ جۇمىستارى جۇرگىزىلدى. بۇل وسى جىلى رەسپۋبليكاداعى بارلىق وڭدەلگەن الاڭنىڭ شامامەن جارتىسىنا جۋىعى. اگرارلارعا قارجىلاي قولداۋ 60 ميلليارد تەڭگە كولەمىندەگى بيۋدجەتتىك نەسيە ەسەبىنەن، سونداي-اق «قازاگرو» ۇلتتىق حولدينگىنىڭ بيۋدجەتتەن تىس كوزدەرىنىڭ ەسەبىنەن كورسەتىلەدى. وسى ۋاقىتقا دەيىن حولدينگ رەسپۋبليكانىڭ اۋىلشارۋاشىلىعى تاۋارىن وندىرۋشىلەردى 85,4 ميلليارد تەڭگەگە قارجىلاندىردى. نەسيەلەۋدەن باسقا اۋىل شارۋاشىلىعىنىڭ ليزينگى سياقتى قۇرال بەلسەندى ىسكە قوسىلعان. بۇل باعدارلاما اياسىندا اعىمداعى جىلى فەرمەرلەر جالپى 31,6 ميلليارد تەڭگە سوماسىنا 1,7 مىڭ بىرلىكتەن استام تەحنيكا ساتىپ الدى.
«بيىلعى جىلعى قولايلى اۋا-رايى ەگىننىڭ بىتىك شىعۋىنا اسەر ەتتى. الدىن الا بولجام بويىنشا، جالپى اۋىل شارۋاشىلىعى داقىلدارىنىڭ جيىن-تەرىمى 22 ميلليون توننادان اسۋعا ءتيىس»، - دەلىنگەن حابارلامادا.
سونىمەن قاتار مينيسترلىك «ازىق-تۇلىك كەلىسىمشارت كورپوراتسياسى» ۇلتتىق كومپانياسى» اكتسيونەرلىك قوعامىنىڭ استىقتى ساتىپ الۋ باعالارىن دا جاريا ەتكەن. وعان سايكەس، كومپانيانىڭ كوممەرتسيالىق رەسۋرستارى كەلەسىدەي باعالاردى بەلگىلەپ وتىر: 3 سۇرىپتى ءبيدايدىڭ ءبىر تونناسى 41000 تەڭگەدەن 50000 تەڭگەگە، 4 سۇرىپتى 34000 تەڭگەدەن 36000 تەڭگەگە دەيىن، 5 سۇرىپتى 30000 تەڭگە، ال ارپانىڭ 2 سۇرىپتىسى 25000 تەڭگە.
ايتا كەتەرلىگى، اعىمداعى جىلى ازىق-تۇلىك كەلىسىمشارت كورپوراتسياسى ءبيدايدى ساتىپ الۋدىڭ قۇنىن ءونىمنىڭ ساپاسىنا قاراي بەلگىلەيدى.
اۆتور: مارلان جيەمباي
