ەلۋ جاسىندا 22 دەگى بويجەتكەندى توقالدىققا العان كاسىپكەر كوپ ايەل الۋدىڭ سىرىن ايتتى

استانا. قازاقپارات - اقتوبە وبلىسىندا جىلقى ءوسىرىپ، قىمىز وندىرۋمەن اينالىساتىن كاسىپكەر ءۇش ايەلىنىڭ تاتۋ-ءتاتتى ءومىر ءسۇرىپ وتىرعانىن ايتتى دەپ جازادى aktobenews.kz.

ورىنباي جولمۇراتوۆ ايتەكە ءبي اۋدانى اقتاستى اۋىلىنداعى «شىڭعىس» شارۋا قوجالىعىنىڭ باسشىسى. جىلقى شارۋاشىلىعىمەن 12-13 جىلدان بەرى اينالىسادى ەكەن. العاشقىدا 7 بيە ساۋۋدان باستاعان. كەيىن ونى 30 عا، 50 گە، اقىرى 100 گە دەيىن جەتكىزگەن. بيىل 120 بيە ساۋامىن دەپ وتىر.

ءۇش ايەلى بار. ناعىز قازاق. ۇشەۋى دە ءبىر اۋىلدىڭ قىزى ەكەن. 18 جاسىندا ءبىرىنشى رەت ۇيلەنگەن قازاق 32 جاسىندا تاعى ءبىر كەلىنشەك الىپتى.

«ەكىنشى كەلىنشەگىمدى بايبىشەمنىڭ ءوزى بارىپ الىپ بەردى. ال ءۇشىنشى رەت ۇيلەنگەنىمدە 50 جاستا بولدىم. جاس ايەلىم ول كەزدە 22 دە بولدى»، - دەيدى وشاقتىڭ يەسى.

ونىڭ ايتۋىنشا، بىرنەشە ايەل الۋدى شەشەتىن بايبىشە.

«ۇلكەن ايەلىم سىر بەرمەيدى. نەگىزى ءبارىن شەشەتىن ءبىرىنشى ايەل. ودان ەشكىم اسا المايدى. ەكى ايەلىممەن ءبىر شاڭىراقتىڭ استىندا 23 جىل بىرگە تۇردىم. بالالار دا بىرگە ءوستى. قازىر كشى ايەلىممەن تۇرامىن. ۇلكەن ەكەۋى قالادا تۇرادى. ۇيدە قىزعانىش، ۇرىس-كەرىس دەگەن بولمايدى. بالالاردىڭ تويلارىن بىرگە اتقارامىز. ايەل الۋ ويىنشىق ەمەس. ونى اللانىڭ ءوزى رەتتەيدى»، - دەيدى ول.

ورىنباي باسشى شارۋاشىلىق قامىمەن اقتوبەگە ءجيى كەلەتىنىن ايتادى. سوندا بايبىشەسىنىڭ ۇيىنە توقتايدى. ال كەنجە ايەل اۋىلدا شارۋاشىلىقتىڭ باسىندا.

«قازاق كوبەيۋى كەرەك. كوپ ايەل الۋ - اتادان قالعان نارسە. ءبىراق كوپ ايەل الۋدى دا، كوبەيۋدى دە شەشەتىن الدىمەن اللا، ەكىنشى بايبىشە»، - دەيدى ول.