سپورت: 22 ەلدىڭ ايتۋلى بالۋاندارى بارقىتبەلدىڭ باۋرايىندا بەلدەستى
الىس-جاقىن مەملەكەتتەردەن كەلگەن بالۋاندار جانە رەسپۋبليكانىڭ تۇكپىر تۇكپىرىنەن كەلگەن قوناقتار 27- مامىر كۇنى ىرعىزباي اۋليە دوسقانا ۇلىنىڭ كەسەنەسىندە جينالىپ، قاسيەتتى اۋليەگە ارنالعان اسقا قاتىستى. اس پەن سايىستىڭ قۇرمەتتى قوناقتارى قاتارىندا بالۋان داۋلەت تۇرلىحانوۆ، قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى دوسحان جولجاقسىنوۆ، اقىن ۇلىقبەك ەسداۋلەتوۆ، «ۇلى دالا قىراندارى» قوعامدىق مادەني الەۋمەتتىك قوزعالىسىنىڭ تەڭ-ءتوراعاسى سادىبەك تۇگەل، «نۇر وتان» پارتياسىنىڭ ءتوراعاسىنىڭ ءبىرىنشى ورىنباسارىنىڭ كەڭەسشىسى بەرىك ءۋالي، ارداگەر جازۋشى- جۋرناليست سايراش ءابىش قىزى جانە ت. ب. قاتىستى.
«بۇل - شىعىس قازاقستان وبلىسى، تارباعاتاي اۋدانى، اقسۋات اۋىلىندا «نۇر وتان» پارتياسىنىڭ قولداۋىمەن مادەنيەت جانە سپورت مينيسترلىگى، ش ق و اكىمدىگى، دۇنيەجۇزىلىك قازاق كۇرەسى فەدەراتسياسى جانە دۇنيەجۇزى كۇرەس تۇرلەرى قاۋىمداستىعى قازاق كۇرەسىنەن ءداستۇرلى ىرعىزباي دوسقانا ۇلى اتىنداعى حالىقارالىق گران-پري باسەكەسى»، - دەلىنگەن ۇيىمداستىرۋشىلار تاراتقان اقپاراتتا.
ۇيىمداستىرىلعان 4- حالىقارالىق تۋرنيردە گەرمانيا، بەلگيا، چەحيا، پولشا، رەسەي، قىتاي، موڭعوليا، وزبەكستان، قىرعىزستان، تاجىكستان، گرۋزيا، موڭعوليا، ارمەنيا، ازەربايجان، بەلورۋسيا جانە لاتۆيا مەملەكەتتەرىنىڭ 80 گە جۋىق بالۋانى باق سىنادى. قازاق ەلىنىڭ نامىسىن ۇلتتىق قۇراما ساپىنداعى 8 بالۋان قورعادى.
ايتا كەتەيىك، ىرعىزباي دوسحانا ۇلى اتىنداعى جارىس ەڭ العاش رەت وبلىستىق دەڭگەيدە ۇيىمداستىرىلعان بولاتىن. بۇل باستاما 2013-جىلى ايماقتىق دەڭگەيدە وتسە، 2014-جىلى رەسپۋبليكالىق دەڭگەيدە، بىلتىردان بەرى حالىقارالىق دەڭگەيگە كوتەرىلىپ، اعىمداعى جىلى IV رەت ءداستۇرلى تۇردە ۇيىمداستىرىلىپ وتىر.
جارىستىڭ جۇلدە قورى - 6 ميلليون تەڭگە. گران-ءپريدى بەلارۋس بالۋانى ۆاحابەر الەساندار يەلەنسە، ال جەڭىل سالماقتاعى «وگىز» پالۋانى اتاعىن شىمكەنتتەن كەلگەن جاس بالۋان ەرسۇلتان مۇزافاروۆ يەلەندى. اتاۋلى تۋرنيردىڭ باس دەمەۋشىسى - «كازتسينك» ا ق.
سونىمەن قاتار، 29- مامىر كۇنى ەكپىن اۋىلىندا ىرعىزباي دوسقانا ۇلى قازاق كۇرەسى شارا اياسىندا بايگە توبەسىندە دۇركىرەگەن ات جارىسى ۇيىمداستىرىلدى. 5 شاقىرىمدىق «تاي» جارىسى، 10 شاقىرىمدىق «توق» بايگەسى، 30 شاقىرىمدىق «الامان» بايگە ۇيىمداستىرىلدى. باس جۇلدەگە تەمىر تۇلپار تىگىلدى.
