شامامەن 22 مىڭنان استام ءبۇلدىرشىن جەتىم قالدى
بۇل تۋرالى ت ا س س اقپارات اگەنتتىگىنە سىلتەمە جاساعان egemen.kz حابارلادى.
«گۆينەيا، ليبەريا، سەررا-لەونە مەملەكەتتەرىندە شامامەن 22 مىڭنان استام ءبۇلدىرشىن اتا-انالارىنىڭ بىرىنەن نەمەسە ەكەۋىنەن دە ايىرىلعان. ءسابي كۇنىنەن ورنى تولماس قازانى كورىپ، جان-دۇنيەسىنە قاتتى زاقىم كەلدى. مىڭداعان بالالار ءۇشىن بۇل اۋرۋعا دەگەن قورقىنىش جاقىن ارادا باسىلمايدى. ولارعا قولداۋ كورسەتە بىلەيىك»، - دەيدى بىرىككەن ۇلتتار ۇيىمى بالالار قورىنىڭ (يۋنيسەف) گۆينەياداعى وكىلى مۇحاممەد اگ ايوي.
يۋنيسەف-ءتىڭ مالىمدەۋىنشە، ءبىر عانا گۆينەيادا 6200 دەن استام نارەستە اتا-اناسىنان ايىرىلعان. سونداي-اق، كامەلەتكە تولماعان 519 بالا اۋىر ىندەتتەن كوز جۇمدى. ال قاۋىپتى اۋرۋدان ەمدەلگەندەر سانى بۇل كورسەتكىشتەن ەكى ەسە از. بۇگىنگە دەيىن 230 بالا تولىقتاي جازىلعان.
بۇكىل الەمدىك دەنساۋلىق ساقتاۋ ۇيىمى گۆينەيا رەسپۋبليكاسىندا ەبولا اۋرۋىنىڭ جويىلعاندىعىن مالىمدەدى. سوڭعى ناۋقاستىڭ ەمدەلىپ شىققانىنا 42 كۇن بولدى. ياعني، العاشقى ەسەپتەۋ مەرزىمى اياقتالدى. ەندىگى كەزەكتە ىندەتتىڭ ەل ىشىندەگى جويىلعاندىعىن تەرەڭىنەن انىقتاۋ ءۇشىن 90 كۇندىك مەرزىم جاريالاندى.
بۇگىنگە دەيىن الەم بويىنشا ەبولا ۆيرۋسىن جۇقتىرعان 28600 ادامنىڭ 11300 ءى قايتىس بولعان.
