س. كەنجەبەك، بالالار ءۇيىنىڭ تۇلەگى: 22 جىلدان سوڭ انامدى تاۋىپ، سوتقا بەردىم
ال قينالعان ساتتەردىڭ كەرىسىنشە وتكەن شاقتىڭ ۇلەسىندە قالعانىنا قۋانامىز. ءبىراق وتكەن شاقتىڭ كۇناسى ءسىزدى ءبىر كۇنى ۇيقىڭىزدان ءتۇرتىپ وياتسا قايتەر ەدىڭىز؟
كىمنىڭ كۇناسى قانشالىقتى ەكەنىن بەزبەنگە سالۋعا حاقىلى ەمەسپىز. ءتىپتى بىرەۋدىڭ كۇناسىن كورىپ تۇرىپ، سەن ءبىر كەزدە كۇناھار ەدىڭ عوي دەپ ايتۋدىڭ ءوزى ايىپ بولار. سەبەبى حاق تاعالانىڭ كەشىرىپ، كەشپەگەنىن دە پارىقتايتىن ءبىز ەمەس.
بالالار ۇيىندە تاربيەلەنگەن سەرىك كەنجەبەكوۆ ءبىزدىڭ رەداكسيامىزعا ات باسىن بۇرىپ، بۇيىمتايىن ايتتى.
قۇس تا جۇمىرتقالاۋ ءۇشىن الدىمەن ۇيا سالادى
ون جەتى جاسىمدا بالالار ءۇيىنىڭ قابىرعاسىنان ۇلكەن الەمگە قادام باستىم. ءۇيسىز جۇرگەن كەزدەرىم دە بولدى. رەتىن تاۋىپ الماتىداعى «جانۇيا» جاتاقحاناسىنا ورنالاسقان بولاتىنمىن. وندا جيىرما توعىز جاسقا دەيىن تۇرۋعا بولادى دەپ ويلاۋشى ەدىم.
ءبىراق كومەندانت اشىق تۇردە ايتپاسا دا، «مۇندا جانۇيالى جەتىمدەر پانالاي الادى، ال سەن جالعىز ءوزىڭ ءبىر بولمەنى الىپ وتىرسىڭ» دەگەندى ەمەۋرىنمەن جەتكىزىپ كەلەدى. ءبىر كۇنى ىمعا تۇسىنبەگەن، دىمعا دا تۇسىنبەيدى دەپ، اشىق تۇردە ايتاتىنىنا سەنىمدىمىن. وقيعا ءدال سولاي ءوربىپ، مەنىڭ جانۇيا قۇرماي جاتاقحانادا تۇرىپ جاتقاندىعىمدى العا تارتسا، مەن دالادا قالعالى تۇرمىن. ماعان كومەك قولىن سوزا الاتىن ازاماتتار بار ما ەكەن؟ مەن جانۇيا قۇرۋعا ءالى دايىن ەمەسپىن عوي. قۇداي-اۋ، «تورعاي ەكەش تورعايدىڭ ءوزى» جۇمىرتقالاۋ ءۇشىن الدىمەن ۇيا سالىپ الادى عوي. ال مەن باسپاناسىز قالاي ۇيلەنەمىن؟
ءوزىم جەتىمدىكتىڭ ازابىن ابدەن تارتتىم. بالالارىمنىڭ پاتەردەن پاتەرگە كوشىپ جۇرگەنىن قالامايمىن. سوندىقتان جاتاقحانادا قالۋ ءۇشىن ۇيلەنۋ كەرەك دەگەن ءسوزدى مەن مۇلدەم تۇسىنبەيمىن. «جانۇيا» جاتاقحاناسىنان بولەك، «جاستار» ءۇيى دەگەن دە بار. ءبىراق مەن باسىنان ول جەردەن ورىن الماعانمىن. سەبەبى «جەتىمدەر ءۇيىنىڭ بالالارى قىلمىسقا جاقىن كەلەدى، ولار اياۋ دەگەندى ۇقپايدى»، - دەگەن پىكىردى وزگەرتكىم كەلەدى.
ال كۇللى قوعامنىڭ پىكىرىن وزگەرتۋ ءۇشىن ءوزىڭ دە وزگەرۋ كەرەك قوي. وسى ويمەن ول جەردەن ورىن الماپ ەدىم، ەندى پانالايتىن ءۇي مۇڭعا اينالىپ بارادى.
انامدى تاۋىپ، سوتقا جۇگىندىم
بالالار ۇيىندە جۇرگەندە انامنىڭ جامالىن كورۋ ارمانىم بولاتىن. مۇقاعالي اقىن «باقىت دەگەن سەنىڭ بالا كەزدەرىڭ» دەپ جىرعا قوسقان عوي. ال ونداعىلار باقىت جايىندا باسقاشا تۇسىنىكتە. مەن دە باقىت بالالار ءۇيىنىڭ قابىرعاسىنىڭ تىسىندا دەي ويلايتىنمىن. وسىلايشا ا ح ا ج ءبولىمى مەن پەرزەنتحانالاردى شارلاپ تابانىمنان توزدىم. تۋۋ تۋرالى كۋالىگىمدە انامنىڭ اتى جازىلىپ تۇر. سول ارقىلى ىزدەدىم. انامنىڭ مەنەن باس تارتۋ قاعازىن پەرزەنتحانا مۇراعاتىنان تاپتىم.
وسىلايشا شەكسىز قۋانىشپەن اناما قوڭىراۋ شالدىم. «كەلە عوي، بالام»، - دەسە، سول ساتتە قوس وكپەمدى قولىما ۇستاپ جەتىپ بارار ەدىم. الايدا انام مەنى كورگىسى كەلمەيدى ەكەن.
مەن ول ءۇشىن جيىرما ءۇش جىلدان سوڭ، ادام وبرازىندا ءتىرىلىپ كەلگەن كۇنا سەكىلدى اسەر قالدىردىم. اشۋلاندىم. جۋرناليستەردىڭ كومەگىنە جۇگىندىم.
جۋرناليستەر ارالاسقان سوڭ مەنى كورۋگە كەلەتىن شىعار دەپ ويلاعانمىن. الايدا انام ماعان جۇرەگىن جىلىتا قويمادى. سوسىن سوتقا جۇگىندىم. سوت ناتيجەسى مەنىڭ جەڭىسىممەن اياقتالدى. انام مەنەن باس تارتقانى ءۇشىن ايىپپۇل تولەيتىن بولدى.
بۇلاي جاساۋ ماعان وڭاي تيمەدى. سەبەبى ول مەنىڭ قيالىمدا جاقسى مىنەزدەرمەن قاشالعان كەيىپكەر بولاتىن. كەيبىر ادامدار مەن دۇنيەگە كەلگەن جىل - اۋىر جىل بولدى دەپ مەنى جۇباتقىسى كەلەدى. ءبىراق اۋىر ەكەن دەپ بۇكىل انالار 1991 -جىلى بالاسىن تاستاپ كەتكەن جوق قوي. انام ول كەزدە ون التى عانا جاستا بولعان ەكەن.
ءالى ءوزىنىڭ بۋىنى بەكىمەگەن، مەنى جەتكىزۋ قيىن بولار دەپ تە ءوزىمدى جۇباتاتىنمىن. ال قازىر مەنىمەن قاۋىشۋعا نە كەدەرگى. راس ول ودان سوڭ جانۇيا قۇردى. ەكى قىزى بار ەكەن. راس- وتىرىگىن بىلمەيمىن، ءبىراق قىزدارى اكەسىمەن بىرگە تۇرادى ەكەن. ال انام ءوز تۋىستارىمەن عۇمىر كەشىپ جاتسا كەرەك. وسىلايشا مەن ومىرگە كەلگەننەن كەيىن بەس كۇننەن سوڭ انام مەنەن جەرىپتى. دامۋشى ەلمىز عوي. مەنىڭ اياۋلى قوعامىم، سىزدەر مەنەن جەرىمەڭىزدەر. مەنىڭ باسپانامنىڭ ماسەلەسىن شەشۋگە قولۇشىن سوزساڭىزدار ەكەن. مەن سىزدەرگە سەنەمىن. جاقسى ادامدار بار عوي. جۇمىلا كوتەرىپ، تالقىلاپ، ماعان كومەكتەسەرسىزدەر.