قورا ورتەنىپ، 22 اراب سايگۇلىگى جانىپ كەتتى

استانا. قازاقپارات - كالينينگرادتىقتار پرۋدكي كەنتىندەگى ورتتە كۇيىپ قالعان اسىل تۇقىمدى جىلقىلاردى ەمدەۋ ءۇشىن قارجى ىزدەستىرىپ جاتىر، دەپ حابارلادى روسبالت.

بۇعان دەيىن حابارلانعانداي، 4 - قازانعا قاراعان ءتۇنى ات قورادا 22 جىلقى ورتەنىپ كەتتى. پوليتسيا تاراتقان اقپاراتقا سۇيەنسەك، وندا 26 جىلقى بولعان، تورتەۋى قۇتقارىلدى.

ال كاۋگەرلەر ات قورادا 36 جىلقى بولعانىن الەۋمەتتىك جەلىلەردە حابارلاعان. جىلقىلاردىڭ يەسى ا ق ش-تا تۇرادى. جاۋاپتى ادام رەسمي مالىمدەمە جاساۋدان باس تارتتى.

اراب سايگۇلىكتەرىنىڭ قۇنى 50 مىڭ رۋبلدەن ميلليون رۋبلگە دەيىن ەكەن.

پوليتسيانىڭ باسپا ءسوز قىزمەتىنەن حابارلاعانداي، الدىن الا بولجام بويىنشا ات قورانى بىرەۋلەر قاساقانا ورتەگەن. قىلمىستىق ءىس قوزعالۋى مۇمكىن. ازىرگە كەلتىرىلگەن زالال سوماسى حابارلانعان جوق.