قازاق كۇرەسىنەن «قازاقستان بارىسى» رەسپۋبليكالىق تۋرنيرىنىڭ جۇلدە قورى 225000 ا ق ش دوللارىن قۇرايدى

استانا. قازاقپارات - ۇلت كوشباسشىسى قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ جۇلدەسى ءۇشىن قازاق كۇرەسىنەن «قازاقستان بارىسى» V رەسپۋبليكالىق تۋرنيرىنىڭ فينالدىق كەزەڭى 4 - شىلدە استاناداعى «سارى ارقا» رەسپۋبليكالىق ۆەلوترەگىندە وتەدى.

بيىل بەسىنشى رەت ۇيىمداستىرىلاتىن «قازاقستان بارىسى» تۋرنيرىنە ەلىمىزدىڭ ءار ايماعىنان ىرىكتەلگەن 32 بالۋان مەن بىلتىرعى جىلعى جارىستىڭ جەڭىمپازى مۇحيت تۇرسىنوۆ جولداما الىپ وتىر.

تۇرسىنوۆ تۋرنير ەرەجەسىنە ساي بيىلعى باسەكەگە ىرىكتەۋسىز شىقتى. ىرىكتەۋ جارىسى ناۋرىز ايىنان باستاپ، مامىر ايىنا دەيىن ءۇش كەزەڭ (اۋىل، اۋدان، وبلىس) بويىنشا جۇرگىزىلدى.

«قازاقستان بارىسى» V رەسپۋبليكالىق تۋرنيرىنىڭ جۇلدە قورى  225000  ا ق ش دوللارىن قۇرايدى. ونىڭ ىشىندە 35 مىڭ ا ق ش دوللارى سپورتشىلاردىڭ جاتتىقتىرۋشىلارىنا تاعايىندالعان. جۇلدە قورى تومەندەگىدەي:

1-ورىن - 150 مىڭ ا ق ش دوللارى؛

2-ورىن - 30 مىڭ ا ق ش دوللارى؛

3-ورىن - 10 مىڭ ا ق ش دوللارى.

دودانىڭ باس دەمەۋشىسى «سامۇرىق- قازىنا» ۇلتتىق ءال- اۋقات قورى» ا ق بولىپ تابىلادى.

 ايتا كەتەيىك، بيىلعى «قازاقستان بارىسىنا» قاتىساتىن 33 بالۋاننىڭ 16 سى بۇعان دەيىنگى سايىستاردا ونەر كورسەتتى. ونىڭ ىشىندە تۋرنيرگە ۇزبەي قاتىسىپ كەلە جاتقان ءۇش بالۋان بار. ولار - 2012 - جىلعى «قازاقستان بارىسى» اتانعان بەيبىت ىستىبايەۆ (جامبىل وبلىسى)، 2013 - جىلعى «قازاقستان بارىسى» ايبەك نۇعماروۆ (ش ق و) جانە اقمولا وبلىسىنىڭ الىبى نۇرلان جامالوۆ. وسى ءۇش بالۋان 2011 - جىلدان بەرى ۇيىمداستىرىلىپ كەلە جاتقان تۋرنيردەن بىردە -ءبىر رەت قالعان ەمەس.

اۆتور: رۋسلان عابباسوۆ