22 جاردەماقىعا رەفورما جۇرگىزىلمەيدى - قاي تولەمدەر وزگەرىسسىز قالدى
استانا. KAZINFORM - قازاقستاندا اتاۋلى الەۋمەتتىك قولداۋ تەتىكتەرىن جەتىلدىرۋ اياسىندا بارلىق جاردەماقى وزگەرىپ كەتپەيدى. تولەمدەردىڭ 22 ءتۇرى بۇرىنعى تارتىپپەن ساقتالادى.
بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ ايتىپ بەردى.
رەسپۋبليكالىق بيۋجەتتەن تولەنەتىن 36 الەۋمەتتىك تولەمنىڭ 22 ءسى بۇرىنعى تارتىپپەن ساقتالادى.
- ونىڭ ىشىندە يادرولىق سىناقتار مەن ساياسي قۋعىن-سۇرگىننەن زارداپ شەككەن ادامدارعا بەرىلەتىن تولەمدەر بار. زياندى ەڭبەك جاعدايلارىندا جۇمىس ىستەگەن ادامدارعا جانە مۇگەدەكتىگى بار ادامداردىڭ جەكەلەگەن ساناتتارىنا ارنالعان تولەمدەر بۇرىنعىشا ساقتالادى، - دەدى ا. ەرتايەۆ ورتالىق كوممۋنيكاتسيالار قىزمەتىندە.
بۇل تولەمدەر ءۇشىن ءۇي شارۋاشىلىعىنىڭ ءال-اۋقات دەڭگەيى ەسكەرىلمەيدى.
ءمينيستردىڭ ايتۋىنشا، جاڭا ءتاسىلدىڭ ماقساتى - الەۋمەتتىك كومەكتى قىسقارتۋ ەمەس، ونى ناقتى مۇقتاج ادامدارعا ءادىل ءارى اتاۋلى تۇردە باعىتتاۋ.
14 تولەم بويىنشا مۇقتاجدىق دەڭگەيىن باعالاۋ ەنگىزىلەدى. شەكتەۋلەر ا جانە ۆ ساناتىنداعى ءال-اۋقاتى جوعارى وتباسىلارعا قاتىستى قولدانىلادى.
ورتا تاپ پەن الەۋمەتتىك وسال وتباسىلار مەملەكەتتىك قولداۋ الۋ قۇقىعىن ساقتايدى. ال ەرەكشە قورعاۋعا الىنعان ساناتتار ءۇشىن قولدانىستاعى كەپىلدىكتەر ساقتالادى.
- وتباسىنىڭ سيفرلىق كارتاسى ءبىرىڭعاي كريتەري قولدانۋدى، وتباسىلاردىڭ ءال-اۋقاتىن تۇراقتى تۇردە قايتا باعالاۋدى جانە جاعدايى ناشارلاعان كەزدە تولەمدەردى الۋ قۇقىعىن قالپىنا كەلتىرۋدى قامتاماسىز ەتەدى، - دەدى ەڭبەك جانە حالىقتى الەۋمەتتىك قورعاۋ ءمينيسترى.
بۇعان دەيىن ا. ەرتايەۆ بىردە-ءبىر مۇقتاج قازاقستاندىق قولداۋسىز قالمايتىنىن ايتقان ەدى.
ال جاردەماقى ءۇشىن اجىراسۋدىڭ الدىن الۋ ءۇشىن بولەك تۇراتىن اتا-انالار دا بالانىڭ وتباسى قۇرامىنا ەنگىزىلەدى.
