22 گراناتا، 512 پاترون: الماتىدا قارۋ-جاراق جاسىرىلعان تاعى ءبىر ورىن انىقتالدى

الماتى. قازاقپارات - الماتىدا قاڭتار وقيعاسىنان كەيىن وق-دارىلەر مەن قارۋ-جاراق جاسىرىلعان ورىندار ءالى دە انىقتالىپ جاتىر، دەپ حابارلايدى قازاقپارات ءتىلشىسى.

بۇل جولى قارۋ-جاراق ساقتالعان قويما مەدەۋ اۋدانىنداعى ساياجاي القابىنان تابىلدى.

اتاپ ايتقاندا، 2 ماكاروۆ تاپانشاسى، تەگىس ۇڭعىلى مىلتىق، 512 دانا ءارتۇرلى كاليبرلى پاترون، ونىڭ ىشىندە كالاشنيكوۆ اۆتوماتىنا ارنالعان پاتروندار بار، 22 دانا گراناتا جانە راديوستانتسيا انىقتالدى.

الماتى قالالىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، اتالعان فاكتى ق ر قىلمىستىق كودەكسىنىڭ 287-بابىمەن تەرگەلەدى. سونداي-اق پوليتسيا مالىمەتىنشە، قارۋ-جاراق جاسىرىلعان ورىننان وسىمدىك تەكتەس جانە ۇنتاق ەسىرتكى زاتتارى تابىلدى.

قىلمىستىق ءىس اياسىندا سوت-بالليستيكالىق جانە سوت-حيميالىق ساراپتامالار تاعايىندالدى.

ەسكە سالايىق، بۇگىن ۇلكەن الماتى كانالى بويىنداعى ورمان بەلدەۋىنەن قارۋ-جاراق ارسەنالى تابىلعانى تۋرالى جازعان ەدىك.