الماتىلىق 22 جاستاعى جىگىت 51 ادامدى الداپ، جۇرتتىڭ 4 ميلليون تەڭگەسىن قالتاسىنا باسقان

تەرگەۋ بارىسىندا ونىڭ 51 ادامدى الداپ، 4 ميلليون تەڭگەنى جىمقىرعانى انىقتالدى، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جىلدىڭ باسىندا ينتەرنەتتە تاپسىرىسپەن جيھاز جاسايمىن دەگەن حابارلاندىرۋ پايدا بولعان. پەتروپاۆلدىڭ ءۇش تۇرعىنى دا ول بويىنشا حابارلاسىپ، الدىن الا تولەم جاساعان. كەيىن بايلانىس ءۇزىلىپ، قالا تۇرعىندارىنا پوليتسياعا ارىزدانۋدان باسقا امال قالماعان.

وبلىستىق پوليتسيانىڭ جەدەل ۋاكىلدەرى تەرگەۋ بارىسىندا وسى فاكتى بويىنشا 51 ەپيزودتى انىقتاعان. الاياقتىق قارماعىنا ەلىمىزدىڭ بىرنەشە ءوڭىرىنىڭ تۇرعىندارى ىلىككەن. قازاقستاندىقتار قاسكويگە 4 ميلليونعا جۋىق تەڭگە اۋدارعان.

ق ر قىلمىستىق كودەكسىنىڭ «الاياقتىق» بابى بويىنشا سوت ونى 4 جىل 8 ايعا باس بوستاندىعىنان ايىرۋعا ۇكىم شىعاردى، ال بۇرىن جاساعان مۇلىكتىك قىلمىس ءۇشىن جازانىڭ وتەلمەگەن بولىگىن ەسكەرە وتىرىپ سوڭعى ۇكىم 6 جىل 4 ايدى قۇرادى.

«جىل باسىنان س ق و-دا 649 ينتەرنەت- الاياقتىق فاكتىسى تىركەلدى. سونىڭ ىشىندە 250 دەن استامى ينتەرنەت ارقىلى تاۋارلار مەن قىزمەتتەردى ساتۋمەن بايلانىستى. ساتۋشىنىڭ ادالدىعىنا ءجۇز پايىز كوز جەتكىزبەيىنشە، الدىن الا تولەم جاساماۋدى سۇرايمىز» ، - دەيدى س ق و پ د باستىعىنىڭ ورىنباسارى رۋسلان نازاروۆ.