قازاقپارات كۇنتىزبەسى: 21- قاڭتار

اتاۋلى كۇندەر

حالىقارالىق دوستىق قۇشاق كۇنى

بۇل جاڭا مەرەكەنىڭ ءداستۇرى بويىنشا تانىمايتىن ادامدى دا دوستىق قۇشاعىنا الۋعا بولادى. مەرەكە باتىس ەۋروپالىق ستۋدەنت جاستاردان باستاۋ الادى.

قازاقستان رەسپۋبليكاسى قارۋلى كۇشتەرىنىڭ ينجەنەرلىك اسكەر كۇنى

تاۋەلسىز قازاقستاندا ينجەنەرلىك اسكەر قارۋلى كۇشتەر قۇرىلعاننان بەرى بار. ينجەنەرلىك اسكەر جاساقتارىنىڭ ساربازدارى ەلىمىز اۋماعىندا دا، شەتەلدە دە ءتۇرلى وقۋ-جاتتىعۋ جيىندارىنا قاتىسىپ كەلەدى.

ەستە قالار وقيعالار

1932-جىلى «كازاحستانسكايا پراۆدا» گازەتىنىڭ العاشقى ءنومىرى جارىق كوردى. «كازاحستانسكايا پراۆدا» گازەتىنىڭ بۇرىنعى اتاۋى «يزۆەستيا كيرگيزسكوگو كرايا» بولعان، ونىڭ العاشقى ءنومىرى 1920-جىلى 1- قاڭتاردا شىقتى.

ول بەيسەنبى سايىن شىعاتىن اپتالىق گازەت بولدى. 1932-جىلعى 20- قاڭتاردا قازرايكوم III پلەنۋمىنىڭ قاۋلىسىمەن «سوۆەتسكايا ستەپ» «كازاحستانسكايا پراۆدا» بولىپ وزگەرتىلدى. 1932 -جىلعى 21- قاڭتاردان باستاپ العاشقى ءنومىرى شىعا باستادى.

1995 -جىلى قازاقستاندا «ىسكەر ايەلدەر قاۋىمداستىعى» رەسپۋبليكالىق قوعامدىق بىرلەستىگى قۇرىلدى. بىرلەستىك ىسكەر ايەلدەردىڭ قىزمەت سالاسىن مەن الەۋمەتتىك باعىتتىلىعىنان تىس ىسكەر ايەلدەردىڭ جوعارى مارتەبەسى مەن ءيميدجىن قالىپتاستىرۋ، ىسكەر ايەلدەردى شوعىرلاندىرۋ، سونداي-اق ايەلدەر مەن وتباسى قۇقىقتارى مەن مۇددەلەرىن قورعاۋ ماقساتىندا قۇرىلدى.

1997 -جىلى الماتىداعى ماگنيتوگورسك كوشەسى اكتەر، ك س ر و- نىڭ حالىق ءارتىسى ىدىرىس نوعايبايەۆتىڭ اتىنا وزگەرتىلدى.

2009 -جىلى رەسپۋبليكانىڭ ەلورداسىندا قالانىڭ 10 جىلدىق مەرەيتويىنا ارنالعان «استانا» ەنتسيكلوپەدياسىنىڭ تۇساۋكەسەر ءراسىمى ءوتتى. ودان قالانىڭ تاريحى، ەكونوميكاسى، تۇرعىندار قۇرامى، مادەنيەتى، ءبىلىمى، عىلىمى، كورىكتى جەرلەرى، تاريحي جانە مادەني مۇراسى، قالا قۇرىلىسى، سونىمەن بىرگە سيرەك كەزدەسەتىن عيماراتتار، ساۋلەتتىك انسامبلدەرى تۋرالى تانىسىپ بىلۋگە بولادى.

ەنتسيكلوپەديادا عىلىم مەن بىلىم، ونەر سالاسىنداعى بەلگىلى قايراتكەرلەردىڭ ومىردەرەكتەرى بار. ەنتسيكلوپەديا 20000 دانامەن قازاق جانە ورىس تىلىندە شىعارىلعان.

2013 -جىلى ق ر پرەزيدەنتى نۇرسۇلتان نازاربايەۆتىڭ جارلىعىمەن استانا قالاسى مەن اقمولا وبلىسىنىڭ شەكارالارى وزگەردى. وسىلايشا استانا قالاسى جەرلەرىنىڭ جالپى الاڭى 17,1 گەكتار بولىگى اقمولا وبلىسىنىڭ سەلينوگراد اۋدانىنىڭ شەكاراسىنا جانە اقمولا وبلىسى سەلينوگراد اۋدانى جەرلەرىنىڭ جالپى الاڭى 17,1 گەكتار بولىگى استانا قالاسىنىڭ شەكاراسىنا قوسىلدى.

2014-جىلى نيۋ-يوركتە ب ۇ ۇ جانىنداعى تۇراقتى وكىلدەر قازاقستاننان قايرات ءابدىراحمانوۆ پەن ترينيداد جانە توباگودان رودنەي چارلز ەكى مەملەكەت اراسىنداعى ديپلوماتيالىق قاتىناستاردى بەلگىلەۋ تۋرالى بىرلەسكەن قۇجاتقا قول قويدى.

ترينيداد جانە توباگو - كاريب تەڭىزىنىڭ وڭتۇستىگىندە ورنالاسقان ارال مەملەكەت، وندا 1,3 ميلليوننان استام ادام تۇرادى. نەگىزگى ەكونوميكالىق سەكتورلارى - مۇناي، تابيعي گاز ءوندىرۋ جانە وڭدەۋ.

2014 -جىلى دۇنيەجۇزىلىك تحەكۆونودو فەدەراتسياسىنىڭ پرەزيدەنتى چۋنگۆون چو نۇرسۇلتان نازاربايەۆقا قۇرمەتتى توعىزىنشى دان (WTF) مەن بەلدىك جانە كيمانو تارتۋ ەتتى. مەملەكەت باسشىسى بۇل كيمانونى تحەكۆوندودان جوعارى اتاق الاتىن قازاقستاندىق سپورتشىعا سىيلايتىنىن اتاپ ءوتتى.

2014 -جىلى قازاق ۇلتتىق ونەر ۋنيۆەرسيتەتى كوللەدجىنىڭ ەكىنشى كۋرس ستۋدەنتى فارحاد مادەنوۆ لاس-ۆەگاستا اياقتالعان «حرۋستالنايا ماگنوليا» جاس ورىنداۋشىلاردىڭ XIX حالىقارالىق مۋزىكالىق بايقاۋىنىڭ باس جۇلدەسىن جەڭىپ الدى.

جەڭىمپازعا لوس-اندجەلەستەگى بەدەلدى مۋزىكالىق وقۋ ورىندارىنىڭ بىرىندە تەگىن وقۋ مۇمكىندىگى بەرىلەدى.

2016 -جىلى تۇركى حالىقتارىنىڭ بۇكىل الەمدىك كونگرەسى ءال-فارابي اتىنداعى قازاق ۇلتتىق ۋنيۆەرسيتەتىنە «تۇركى ەلدەرىنىڭ ۇزدىك جوعارى وقۋ ورنى» اتاعىن بەردى. 2017-جىلى وتانداسىمىز كيريلل گەراسيمەنكو قازاقستان رەسپۋبليكاسى تاريحىندا ITTF World Tour جارىستارىنىڭ اقتىق كەزەڭىنە ءوتىپ، ۇستەل تەننيسىنەن الەمدىك تۋر چەمپيونى اتانعان تۇڭعىش سپورتشى بولدى. 21 جاسقا دەيىنگى توپتا استانا قالاسى اكىمدىگىنىڭ مامانداندىرىلعان جوعارى سپورتتىق شەبەرلىك مەكتەبىنىڭ وكىلى كيريلل گەراسيمەنكو اقتىق سىندا 3:2 ەسەبىمەن فرانسۋز اككۋزۋ كاننان باسىم ءتۇستى.

2019 -جىلى وسكەمەندە ولگا رىپاكوۆا سىيلىعىنا جەڭىل اتلەتيكادان حالىقارالىق تۋرنير ءوتتى. ميحايل ليتۆين جەڭىسكە جەتىپ، قازاقستاننىڭ جاڭا جوعارى جەتىستىگىن ورناتتى. سپورتشى 400 مەترگە جۇگىرۋدەن ءبىرىنشى ورىن الدى. ونىڭ ۋاقىتى - 46.26 بولىپ، قازاقستاننىڭ جاڭا رەكوردى ورناتىلدى.