پويىز 21 باس قويدى باسىپ كەتتى - قاراعاندى وبلىسى
«ازاماتتاردىڭ بەيقامدىعى جانە ءۇي مالدارىن تەمىرجول بولىگىنە جىبەرۋى وزەكتى ماسەلەلەردىڭ ءبىرى بولىپ وتىر. تەمىرجول اسا قاۋىپتى اۋماق بولىپ سانالادى، بۇل جونىندە كولىك پوليتسەيلەرى ۇنەمى ەسكەرتىپ وتىرادى»، - دەدى كولىكتەگى پوليتسيا دەپارتامەنتى باستىعىنىڭ ورىنباسارى نۇرجان اليبايەۆ.
ونىڭ ايتۋىنشا، پويىزدىڭ مالدى باسىپ كەتۋى سالدارىنان جىلجىمالى قۇرامنىڭ رەلستەن شىعىپ كەتۋىنە، ادامدار جاراقاتى سياقتى اۋىر جاعدايلارعا اكەپ سوقتىرۋى مۇمكىن. بيىل 17-ماۋسىمدا «نوۆالى - سارىشاعان» وتكەلىندە جولاۋشىلار پويىزى 21 باس قويدى باسىپ كەتتى. «جۇرگىزىلگەن ءىس-شارالار ناتيجەسىندە مالدىڭ يەسى انىقتالدى. ول 30 جاستاعى قاراعاندى وبلىسى سارىشاعان كەنتىنىڭ تۇرعىنى بولىپ شىقتى. مال يەسى وتار قويدى تەمىر جولدىڭ بۇرىلىس بولىگىندە جايعانى ءۇشىن اكىمشىلىك جاۋاپكەرشىلىككە تارتىلدى. وعان 5 ا ە ك كولەمىندە ايىپپۇل سالىندى»، - دەلىنگەن كولىكتەگى پوليتسيا دەپارتامەنتىنىڭ باسپا ءسوز قىزمەتى مالىمەتىندە.
اۆتور: رۋسلان عابباسوۆ
