قازاقپارات كۇنتىزبەسى: 21-جەلتوقسان
21- جەلتوقسان. سەنبى
ەستە قالار وقيعالار
1868-جىلى دالا گەنەرال-گۋبەرناتورلىعى قۇرامىندا اقمولا وبلىسى قۇرىلدى. ورتالىعى بولىپ ومبى قالاسى تاڭدالدى. وبلىس قۇرامىنا 5 ۋەز - اقمولا، ومبى، پەتروپاۆل، كوكشەتاۋ، سارىسۋ كىردى.
1991-جىلى 11- تاۋەلسىز مەملەكەتتىڭ باسشىلارى الماتى دەكلاراتسياسىن قابىلدادى. بۇل قۇجاتقا سايكەس، تاۋەلسىز مەملەكەتتەر دوستاستىعى قۇرىلىپ، جاڭا دوستاستىقتىڭ تۇساۋى كەسىلدى، سونداي-اق ك س ر و- نىڭ تاراتىلعانى جاريالاندى.
1992-جىلى ق ر جوعارعى كەڭەسى «قازاقستان رەسپۋبليكاسىنىڭ پروكۋراتۋراسى تۋرالى» زاڭ قابىلدادى.
1993-جىلى قازاقستاندا «التىن جۇلدىز»، «حالىق قاھارمانى» اتاعى، وردەندەر، مەدالدار، جانە باسقا مەملەكەتتىك سىيلىق بەلگىلەرىنىڭ بەينەلەرى بەكىتىلدى. بۇل وردەنمەن تەك، قانا قازاقستان رەسپۋبليكاسىنا ەڭبەك سىڭىرگەن ازاماتتار ماراپاتتالادى. قازاقستان رەسپۋبليكاسىنىڭ پرەزيدەنتى «التىن قىران» وردەنىنىڭ كاۆالەرى اتانادى. «حالىق قاھارمانى» اتاعىن العاندارعا «التىن جۇلدىز» ەرەكشە بەلگىسى جانە «وتان» وردەنى بەرىلەدى. «وتان» وردەنى - قازاقستان رەسپۋبليكاسىنىڭ جوعارعى وردەندەرىنىڭ ءبىرى. «وتان» وردەنىمەن مەملەكەتتىك جانە قوعام قىزمەتتەرىندە: ەكونوميكانى دامىتۋدا، الەۋمەتتىك سالادا، عىلىم مەن مادەنيەتتە، قۇقىق قورعاۋ جانە اسكەري قىزمەتتە، دەموكراتيا مەن الەۋمەتتىك سالانى دامىتۋدا ەرەكشە ەڭبەكتەرى ءۇشىن ماراپاتالادى.
1995-جىلى قازاقستان رەسپۋبليكاسىنىڭ يزرايلدەگى ەلشىلىگى اشىلدى.
2007-جىلى قازاقستان پرەزيدەنتى نۇرسۇلتان نازاربايەۆقا ماسكەۋ مەملەكەتتىك حالىقارالىق قاتىناستار ينستيتۋتىنىڭ قۇرمەتتى دوكتورى اتاعى بەرىلدى.
2010-جىلى «قازپوشتا» ا ق 2011-جىلدىڭ قاڭتار-اقپان ايلارىندا استانا جانە الماتى قالالارىندا VII قىسقى ازيادا ويىندارىنىڭ وتكىزىلۋىنە وراي «سپورت» سەرياسىنىڭ ءتورت پوشتا ماركاسىن اينالىمعا شىعاردى - «ترامپليننەن سەكىرۋ»، «مانەرلەپ سىرعاناۋ»، «فريستايل» جانە «VII قىسقى ازيادا ويىندارىنىڭ ەمبلەماسى».
2010-جىلى اباي شىعارمالارى نەمىس تىلىندە جارىق كوردى. كىتاپقا ۇلى اقىننىڭ ولەڭدەرى مەن قارا سوزدەرى كىردى.
2010-جىلى قازاقستاندىق شوۋ بيزنەستىڭ تانىمال قايراتكەرى قىدىرالى بولمانوۆ پاتشايىم ۆيكتوريا وردەنى (The Royal Victorian Order) ناگراداسىن الدى. قىدىرالى بولمانوۆ - قازاقستان مادەنيەتىنىڭ مۇنداي قۇرمەتكە يە بولعان ءبىرىنشى وكىلى. پاتشايىم ۆيكتوريانىڭ حالىقارالىق ناگراداسىنىڭ مەدالى مەن القاسى 999,9 سىنامالى التىن جالاتىلعان باعالى مەتالداردان جاسالعان.
2012-جىلى قر ۇلتتىق بانكى «تاڭبالى پەتروگليفتەرى» ەسكەرتكىش كۇمىس شاقالارىن اينالىمعا شىعاردى.
2012-جىلى ساق كەزەڭى ارحەولوگيالىق قازبالارى نەگىزىندە «قاناتتى بارىس تۋرالى اڭىز» مۋلت فيلمى ءتۇسىرىلدى.
2013-جىلى س. تورايعىروۆ اتىنداعى پاۆلودار مەملەكەتتىك ۋنيۆەرسيتەتى ستۋدەنتتەرىنىڭ بەس جوباسى ىستانبۇلدا (تۇركيا) ەۋرازيا ساۋلەت-قۇرىلىس جانە ديزاينەرلىك مەكتەپتەردىڭ III حالىقارالىق فەستيۆالىندە ۇزدىكتەر قاتارىنان تابىلدى.
ون ءبىر ەۋروازياتتىق ەلدىڭ 48 جوعارى وقۋ ورنىنىڭ 100 دەن استام وكىلدەرى بايقاۋعا 260 جۇمىس ۇسىنعان.
2017-جىلى استانادا قازاقستان پرەزيدەنتى نۇرسۇلتان نازاربايەۆتىڭ «بولاشاققا كوزقاراس: قوعامدىق سانانى جاڭعىرتۋ» ماقالاسىنا ۇزدىك ديزاينەرلىك شەشىمدەر بايقاۋىنىڭ جەڭىمپازدارى ماراپاتتالدى. بايقاۋدا گران-پري جۇلدەسىن جەڭىپ العان پاۆلودارلىق دەنيس رومانوۆقا 2 ميلليون تەڭگە تابىستالدى. ال جۇلدەلى ءبىرىنشى ورىندى جەڭىپ العان نازاربايەۆ ۋنيۆەرسيتەتىنىڭ ستۋدەنتى ءمادينا مۇقانوۆاعا «قازاقپارات» ح ا ا باس ديرەكتورى اسقار ۋماروۆ 1,5 ميلليون تەڭگەنىڭ سەرتيفيكاتىن تابىس ەتتى. ەكىنشى ورىندى (1 ميلليون تەڭگە) پاۆلودار قالاسىنان كەلگەن رۋستام ساريموۆ ۇتىپ السا، ءۇشىنشى ورىن ل. گۋميليەۆ اتىنداعى ە ۇ ۋ ستۋدەنتى ساۋلە جيەنقۇلوۆاعا (500 مىڭ تەڭگە) بۇيىردى.
2018-جىلى «استانا» حالىقارالىق قارجى ورتالىعىنىڭ بيرجاسى (AIX) ەۋروپا، ازيا جانە جەرورتا تەڭىزى الابىنىڭ 33 مۇشەسىن بىرىكتىرەتىن ەۋروپا-ازيالىق قور بيرجالارى فەدەراتسياسىنىڭ تولىققاندى مۇشەسى بولدى.
فەدەراتسيانىڭ ماقساتى مەن ميسسياسى - ەۋرازيا ءوڭىرىنىڭ (ەۋروپا، ازيا، جەرورتا تەڭىزى الابى) كاپيتال نارىقتارىن دامىتۋعا، ىلگەرىلەتۋگە جانە ولاردىڭ ىنتىماقتاستىق ورناتۋىنا جاردەمدەسۋ. بۇل ۇيىمنىڭ مۇشەسى بولۋ AIX ءۇشىن بيزنەستى قولداۋ، ترەنينگتەر مەن ۆەبينارلار، زەرتتەۋلەر مەن جاريالانىمدار ارقىلى ءبىلىم الماسۋ، PR قولداۋ، FEAS ConFEAS فلاگماندىق ءىس-شاراعا قاتىسۋ سياقتى FEAS ارتىقشىلىقتارىن الۋعا مۇمكىندىك بەرەدى.
