قازاقستان كيبەرسپورتشىلاردىڭ سانى جونىنەن الەمدە 21-ورىندا

دەگەنمەن، كاسىبي ويىنشىلاردىڭ سانى كوپ ەمەس - 50 گە جۋىق. ءبىراق بۇل دا ۋاقىت ەنشىسىندە. بۇگىندە مادەنيەت جانە سپورت مينيسترلىگىندە رەسمي تىركەلگەن جاڭا سپورت ءتۇرىن دامىتۋعا بارلىق جاعدايلار جاسالۋدا.

قانىش ابىكەنوۆ ونلاين-فۋتبولمەن كاسىبي تۇردە اينالىسادى. گەيمەر رەسپۋبليكالىق تۋرنيرلەردە جەڭىسكە جەتكەن، كيبەرسپورتتان ازيا ويىندارىنا دا قاتىسقان. قانىش كومپيۋتەرلىك ويىندارعا قىتايدا وقىپ جۇرگەن كەزدە قىزىعا باستاعان. ۋاقىت وتە كەلە حوببي ماماندىققا اينالدى. قازىر كيبەرسپورتشى ماسكەۋدە وتەتىن ءىرى حالىقارالىق جارىسقا دايىندىق ۇستىندە.

«بۇگىندە بۇل يندۋستريا جاقسى دامىعان. قازاقستان اتىنان شىققان تۋرنيرلەردە بار كۇش-جىگەرىمىزدى سالۋعا تىرىستىق: جەڭۋ كەرەك، ناتيجە كورسەتۋ قاجەت. الداعى جاقىن ۋاقىتتا يندونەزيا مەن مالايزيا ءوزارا ۇيىمداستىراتىن ازيالىق تۋرنيرلەر بار. مەن شاقىرۋ الدىم. ءالى شەشىم قابىلدامادىم. مۇمكىن ناۋرىزدىڭ سوڭى-ءساۋىردىڭ باسىندا بارىپ قالامىن»، - دەيدى ول.

جالپى قازاقستاندا كيبەرسپورتقا ءبىر ميلليوننان استام ادام قىزىعۋشىلىق ءبىلدىرىپ وتىر. ساراپشىلاردىڭ بولجاۋىنشا، وتكەن جىلى كيبەرسپورت اۋديتورياسى 380 ميلليون ادامدى قۇرادى. ال كەلەسى جىلى 500 ميلليوننان اسۋى ىقتيمال.

«ەگەر Dota 2 ديستسيپليناسى تۋرالى ايتار بولساق، وندا جۇلدە قورى 20 ميلليون دوللاردان استى. كيبەرسپورتتى الەۋمەتتىك ليفت رەتىندە پوزيتسيالاۋعا بولادى. ناۋرىز ايىندا قىتايدا كومپيۋتەرلىك سپورتتان حالىقارالىق جارىس وتەدى. ءبىزدىڭ ۇلتتىق قۇراما ىرىكتەۋ كەزەڭىنەن ءوتتى. بۇل، ولاردىڭ كاسىبي دەڭگەيلەرىن كورسەتەدى. سونداي-اق قازىرگى ۋاقىتتا كوماندامىز CS: GO بويىنشا جاقسى ويىن مانەرىن كورسەتۋدە. سوعان قاراپ، قازاقستاندىق كيبەرسپورتشىلاردىڭ كەلەشەگى زور ەكەندىگىن ايتۋعا بولادى»، - دەيدى قازاقستان كيبەرسپورت فەدەراتسياسى جوبالارىنىڭ ۇيلەستىرۋشىسى عالىم بالقانايەۆ.

ونىڭ ايتۋىنشا، كيبەرسپورتشىلاردى قولداۋ ءۇشىن قۇرىلعان فەدەراتسيادا «گەيمەرلىك»، ياعني ۋاقىتتى ماقساتسىز وتكىزۋ ۇعىمىنان ارىلۋ بويىنشا جۇمىستار جۇرگىزىلۋدە.

ەسكە سالايىق، جاۋىردا عانا استانادا ءبىر اپتا بويى وقۋشى بالا ىزدەستىرىلدى. كەيىن ول كومپيۋتەرلىك كلۋبتان تابىلدى.

فەدەراتسيا قازاقستاندىقتاردى دۇرىس ويناۋعا - رەجيمدى جانە باعدارلامانى ساقتاي وتىرىپ ۇيرەتۋگە كۇش سالماق. ال كاسىبي سپورتشىلارمەن باپكەرلەر مەن پسيحولوگتار جۇمىس ىستەيتىن بولادى.

مۇنداي ۇستانىمدى ەلوردالىق پسيحوتەراپيەۆت انار قاراجانوۆا دا قولدايدى.

ماماننىڭ ايتۋىنشا، كومپيۋتەرلىك ويىندار پايدالى دا كورىنەدى. ولار بەيىمدەلۋگە جانە جىلدام ارەكەت ەتۋگە ۇيرەتەدى. باستىسى، شەكتى ءبىلۋ جانە شىنايى ءومىردى ويىنمەن الماستىرماۋ.

«ەگەر كەز كەلگەن ازامات بۇكىل شارۋاسىن جيىپ تاستاپ، بار ويى مەن ۋاقىتىن ۆيرتۋالدى الەمدەگى جارىسقا ارناسا، بۇل اۋرۋدىڭ بەلگىسى. وسىنىڭ كەسىرىنەن ءتۇرلى جاعدايلار ورىن الادى. ال ەگەر ءوزىڭدى ويىنعا ەمەس، كەرىسىنشە، ۇيرەنۋگە، دامۋعا باعىتتاساڭ، كاسىبي سپورتشى رەتىندە قالىپتاسۋعا مۇمكىندىك زور. كەز كەلگەن ءىستىڭ ولشەمى بولۋى ءتيىس»، - دەيدى پسيحوتەراپيەۆت.

ءمالىم بولعانداي، قازاقستان كيبەرسپورتپەن اينالىساتىن ويىنشىلار سانى جونىنەن الەمدە 21-ورىندا تۇر. ولاردىڭ اراسىندا 14-34 جاستاعى ەر ادامدار باسىم.