وڭتۇستىكتەن سولتۇستىككە تاعى 21 وتباسى قونىس اۋداردى
بۇل جولى كوشكەندەردىڭ بارلىعى سارى اعاش اۋدانىنا قاراستى دەربىسەك اۋىلىنىڭ تۇرعىندارى. ولار بۇعان دەيىن سولتۇستىكتىڭ ءبىرقاتار اۋداندارىن ارالاپ، جەرىمەن تۇرعىلىقتى حالقىمەن تانىسىپ قايتقان بولاتىن. ءتىپتى شارۋاشىلىق جۇرگىزۋگە جەر تاڭداپ، ىستەيتىن كاسىبىن دە ناقتىلاپ كەلدى. بارعان سوڭ كوشكەن جانۇيالار بىرىگىپ، دەربەس كووپەراتيۆ قۇرامىز دەيدى. بۇل ماقساتقا 22 مىڭ گەكتار ەگىستىك جەر ءبولىنىپ قويىپتى.
تۇرعىنداردىڭ وزگە جەرگە كوشۋىنە مەملەكەتتىك قولداۋ سەبەپ بولدى. ونىڭ ۇستىنە بيىل كوكتەمدە سولتۇستىكتەگى بىرنەشە وبلىستىڭ وكىلدەرى وسىندا ەڭبەك جارمەڭكەسى وتكىزدى. 636 كاسىپورىن تۇستىك ءوڭىردىڭ ازاماتتارىنا 1 مىڭ 785 بوس جۇمىس ورنىن ۇسىندى. ارنايى ساپار ۇيىمداستىرىپ، ەڭبەك نارىعىنداعى جاعدايىمەن تانىسىپ كەلۋىنە جاعداي جاسادى.
«باسقارما تاراپىنان اۋدان، قالالاردى ارالاپ، جۇمىسپەن قامتۋدى ورتالىقتارى، بولىمدەردە جينالىستار جۇرگىزىلدى. ناسيحاتتاۋ جۇمىستارىنىڭ ارقاسىندا قازىر 200-300-گە جاقىن وتباسى كوشۋگە قىزىعۋشىلىق ءبىلدىرىپ وتىر»، - دەيدى وبلىستىق الەۋمەتتىك باعدارلامالار جانە جۇمىسپەن قامتۋدى ۇيلەستىرۋ باسقارماسىنىڭ باسشىسى مۇحيت وتارشيەۆ.
ايتا كەتەيىك، بۇعان دەيىن سولتۇستىك وبلىستارعا وڭتۇستىكتەن 113 وتباسى قونىس اۋداردى. ولار بۇگىندە مەديتسينا، اۋىل شارۋاشىلىعى، ءبىلىم جانە قۇرىلىس سالالارىندا ەڭبەك ەتىپ ءجۇر. ەندى ءبىرى كاسىپكەرلىكپەن اينالىسىپ، ءوز ءىسىن دوڭگەلەتۋدە.
اۆتور: اينۇر اقبايەۆا
