كوشەدە وتشاشۋ اتقاندار 21 مىڭ تەڭگە ايىپپۇل تولەيدى

قىزىلوردا. قازاقپارات -  قىزىلوردا وبلىسى اۋماعىندا اكىمشىلىك پوليتسيا باسقارماسى مەن ايماقتىق توتەنشە جاعدايلار دەپارتامەنتىنىڭ ورتكە قارسى قىزمەت بولىنىستەرى «پيروتەحنيكا» جەدەل- الدىن الۋ ءىس- شاراسىن باستادى، دەپ حابارلادى «قازاقپارات» ح ا ا ءتىلشىسى و ءى ءى د سىلتەمە جاساپ.

شارانىڭ باستى ماقساتى - زاڭدى جانە جەكە تۇلعالاردىڭ پيروتەحنيكالىق ونىمدەردى ساقتاۋ، ەسەپكە الۋ، قولدانۋ، ساتىپ الۋ، تاسىمالداۋ ءتارتىبىنىڭ ساقتالۋىن تەكسەرۋ، سەرتيفيكاتتالماعان ءونىمدى جەتكىزۋشىلەردى انىقتاۋ، قوعامدىق ورىندار مەن كوشەلەردە، تۇرعىن ۇيلەردە وسى ونىمدەردىڭ سالدارىنان بولاتىن توتەنشە جاعدايلاردىڭ الدىن الۋ. پيروتەحنيكالىق بۇيىمدار سالدارىنان دەنە جاراقاتتارىن بولدىرماۋ، ولاردى حالىق كوپ شوعىرلاناتىن جەرلەردە پايدالانۋدىڭ جولىن كەسۋ ماقساتىندا پوليتسيا جاساقتارىنىڭ، ۋچاسكەلىك پوليتسيا ينسپەكتورلارىنىڭ، مەكتەپ ينسپەكتورلارىنىڭ قاتىسۋىمەن رەيدتىك شارالار ۇيىمداستىرىلۋدا.

وسى ورايدا، ءتارتىپ ساقشىلارى ەلدى مەكەندەردە جانە بۇل ءۇشىن بولىنبەگەن ورىنداردا ارنايى جانە قولدان جاسالعان پيروتەحنيكالاردى جارۋ ورىن العان جاعدايدا، قۇرىلعى تاركىلەنىپ، ال ونىڭ يەسىنە ق ر ا ق ب ت ك- نىڭ 436-بابىنىڭ 2-بولىگىنە سايكەس، 10 ايلىق ەسەپتىك كورسەتكىش كولەمىندە ايىپپۇل سالىناتىنىن ەسكەرتەدى.

سونداي-اق، پيروتەحنيكالىق زاتتاردى جانە قولدان جاسالاتىن بۇيىمداردى ساقتاۋ، ەسەپكە الۋ، پايدالانۋ، تاسىمالداۋ، ولاردى ساتۋ، جويۋ، اكەلۋ جانە اكەتۋ ءتارتىبىن بۇزعان تۇلعالارعا ق ر اكىمشىلىك قۇقىقبۇزۋشىلىق تۋرالى كودەكسىنىڭ 483-بابى 1-بولىگى بويىنشا جەكە تۇلعالارعا -5, شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا -10، ورتا كاسىپكەرلىك سۋبەكتىلەرىنە - 15، ءىرى كاسىپكەرلىك سۋبەكتىلەرىنە - 45-ايلىق ەسەپتىك كورسەتكىش مولشەرىندە ايىپپۇل سالىنادى.

«بۇدان بولەك، ەركىن ساۋدا جاساۋعا قازاقستان رەسپۋبليكاسىنىڭ زاڭناماسىمەن تىيىم سالىنعان نەمەسە شەكتەلگەن تاۋارلار مەن زاتتاردى ساتۋ ق ر ا ق ب ت ك- ءنىڭ 196-بابىنا سايكەس، 25 ايلىق ەسەپتىك كورسەتكىش مولشەرىندە ايىپپۇل سالۋعا اكەلىپ سوعاتىنىن ەسكەرتەمىز»، - دەلىنگەن حابارلامادا.

اۆتور: ەلۋباي اۋەزوۆ