قايرات رىسقۇلبەكتىڭ جاتقان كامەراسى - 21-كامەرا ەمەس

استانا. قازاقپارات - 1986-جىلعى جەلتوقسان وقيعاسىنىڭ قۇربانى، ازات ەلدىڭ ەرتەڭگى تىنىسى ءۇشىن كۇرەسكەن قايرات رىسقۇلبەك تۋرالى تاعى ءبىر تىڭ دەرەك پايدا بولدى.

بۇگىنگى كۇنگە دەيىن ايتىلىپ كەلە جاتقان ەستەلىكتەر مەن ماقالالار، كىتاپ بەتتەرىندە قايرات رىسقۇلبەك سەمەي تۇرمەسىندەگى 21№ كامەرادا جاتتى دەپ ايتىلىپ كەلگەن. ءتىپتى بۇل دەرەكتى ونىڭ جاسىمەن سايكەستەندىرگەن جىر دا تۋدى، پۋبليتسيستيكالىق ماقالالار دا جاريا بولدى. ءبىراق بۇل -  قاتە اقپارات.

1979-1991-جىلدار ارالىعىندا سەمەي قالاسىنداعى وقشاۋلاۋ تەرگەۋ يزولياتورىندا جۇمىس ىستەگەن ماقسۇت ءجۇنىس ۇلى وسپانوۆ بەرگەن سۇحباتىندا قايراتتىڭ 22№ كامەرادا جاتقانىن، 21№ كامەرادا جاتتى دەگەندى كەيىننەن ەستىپ تاڭ قالعانىن ايتتى. ول سوزىنە دايەك رەتىندە قايراتتى جەكە ءوزىن بىرنەشە رەت سول كامەرادان الىپ شىقانىن، مونشاعا جۋىندىرۋعا اپارعانىن ايتتى.

تاريح عىلىمىندا دەرەكتانۋ دەگەن سالا بار. ەلىمىزدە بۇل سالانىڭ قاناتى كەڭگە جايىلماعان. سەبەبى وسى باعىت بويىنشا ۇلكەن پروفەسسورلار جوقتىڭ قاسى. نەگىزگى تۇسىنىگى ماسكەۋ مەملەكەتتىك ۋنيۆەرسيتەتىندە وقىتىلادى. وسى عىلىمنىڭ نەگىزىنە سالساق، تاريحقا قاراپايىم ءسوز نەمەسە ەستەلىك رەتىندە قاراۋعا بولمايدى. دەرەك تانۋ جاعىنان العاندا ناقتى ءارى شىنايى اقپارات بەرىلۋى ماڭىزدى ءرول اتقارادى.

Massaget.kz