ريو وليمپياداسىنا وڭتۇستىك قازاقستان وبلىسىنان 21 سپورتشى بارا جاتىر
بۇل تۋرالى و ق و ايماقتىق كوممۋنيكاتسيالار قىزمەتىندە وتكەن بريفينگتە وبلىستىق دەنە شىنىقتىرۋ جانە سپورت باسقارماسىنىڭ باسشىسى الىبەك نۇرتايەۆ مالىمدەدى.
ونىڭ ايتۋىنشا، ريو-دە-جانەيرو (برازيليا) قالاسىندا وتەتىن XXXI جازعى وليمپيادا ويىندارىنا وبلىستان 21 سپورتشى، سپورتتىڭ 11 تۇرىنەن قاتىسپاق. ءتورت جىلدا ءبىر كەلەتىن وليمپيادا ويىندارىندا سپورتشىلارىمىز وق اتۋ، بوكس، بايداركا جانە كانوەدا ەسۋ، اۋىر اتلەتيكا، جەڭىل اتلەتيكا، دزيۋدو، باتۋتتا سەكىرۋ، ستەند اتۋ، ساداق اتۋ، كوركەم گيمناستيكا مەن ءجۇزۋ سىندى سپورتتىڭ تۇرلەرىنەن ەل نامىسىن قورعايتىن بولادى.
بۇل سپورتتىق جارىسقا قاتىسۋعا ەلىمىزدەن 103 سپورتشى جولداما جەڭىپ العان بولسا، ونىڭ 5/1 بولىگى وڭتۇستىكقازاقستاندىق سپورتشىلاردىڭ ەنشىسىندە.
سونداي-اق، باسپا ءسوز ءماسليحاتىنا ق ر بوكستان ۇلتتىق قۇراما كومانداسىنىڭ باس باپكەرى مىرزاعالي ايتجانوۆ پەن بوكسشىلار ءبىرجان جاقىپوۆ جانە قايرات ەراليەۆ قاتىستى.
بريفينگتە ءسوز العان م. ايتجانوۆ سپورتشىلارىمىزدىڭ جاتتىعۋىنا بارلىق جاعدايلار جاسالعاندىعىن ايتىپ، بۇگىندە بوكسشىلارىمىز ءوز بابىندا ەكەنىن جەتكىزدى.
قازىرگى تاڭدا وبلىسىمىزدىڭ ەڭ تاڭداۋلى دەگەن سپورتشىلارى وليمپيادانىڭ جولداماسىن جەڭىپ الىپ وتىر. جەڭىس تۇعىرىنان كورىنەتىندىكتەرىنە سەنىم بىلدىرگەن باسقارما باسشىسى، بارلىق سپورتشىلارعا ساتتىلىك تىلەدى.
ەستەرىڭىزگە سالا كەتەيىك، 2016-جىلعى جازعى وليمپيادا ويىندارى 5-21- تامىز ارالىعىندا برازيليانىڭ ريو-دە-جانەيرو قالاسىندا وتەدى.
اۆتور: كۇنسۇلتان وتارباي
