استانادا 21 ازاماتقا «ءتىل جاناشىرى» قۇرمەت بەلگىسى تابىستالدى
ەسكە سالا كەتەيىك، «ءتىل جاناشىرى» قوعامدىق بىرلەستىگىنىڭ اتالعان ناگراداسى قازاق ءتىلىنىڭ وركەندەۋىنە اتسالىسىپ جۇرگەن ازاماتتاردى ىنتالاندىرۋدى كوزدەيدى.
«ارامىزدا تۋعان ءتىلىمىزدىڭ دامۋىنا ۇنەمى ۇلكەن ۇلەس قوسىپ، ناعىز ءتىل جاناشىرى بولىپ جۇرگەن ەلىمىزدىڭ تۇپكىر-تۇپكىرىنەن كەلگەن ازاماتتار وتىر. ەلىمىزدە تىلگە جاناشىرلىق كورسەتەتىن ادامدار كوپتەپ سانالادى. وسىعان وراي، بيىلعى جىلعى بىزگە 100 گە جۋىق ۇسىنىس كەلىپ ءتۇستى.
سولاردىڭ ىشىنەن 21 ۇمىتكەردى ىرىكتەپ الدىق. سىزدەردىڭ ءارقايسىڭىزدىڭ ورىنىڭىز بولەك. ءبارىڭىز دە ءتىلدىڭ تاعدىرى ءۇشىن تىنباي كۇرەسىپ جۇرسىزدەر، جاس ۇرپاقتىڭ ءتىلىنىڭ تازا بولۋىنا اتسالىسىپ كەلەسىزدەر. وزگە ۇلت وكىلدەرىنىڭ قازاق ءتىلىن ۇيرەنۋىنە قامقور بولىپ جۇرسىزدەر، سونداي-اق جىلدار بويى كوز مايىن تاۋىسىپ، سوزدىكتەر جاسادىڭىزدار، ءتىلدى دامىتۋعا ارنالعان جوبالاردى قولداپ، ۇلت مەسەناتى اتاندىڭىزدار.
سونىڭ بارلىعى دا ەسكەرىلىپ وتىر»، - دەدى ماراپاتتاۋ ءراسىمىنىڭ الدىندا «ءتىل جاناشىرى» قوعامدىق بىرلەستىگىنىڭ قۇرمەتتى ءتوراعاسى، ق ر پرەزيدەنتى كەڭسەسىنىڭ باستىعى، «ق ر تۇڭعىش پرەزيدەنتى - ەلباسى كىتاپحاناسى» م م ديرەكتورىنىڭ مىندەتىن اتقارۋشى ماحمۇت قاسىمبەكوۆ.
ايتا كەتەيىك، وسى قۇرمەت بەلگىسى بيىل بەسىنشى رەت تابىستالىپ وتىر. بيىلعى ماراپاتتالعاندار اراسىندا ەلىمىزدىڭ بارلىق وڭىرلەرىندەگى ءتىل جاناشىرلارى، سونىمەن قاتار ماسكەۋ مەن ورىنبور قالالارىندا قازاق حالقىنىڭ مادەنيەتى مەن ءتىلىن ناسيحاتتاپ جۇرگەن ازاماتتار قامتىلدى.
اۆتور: رۋسلان عابباسوۆ
