مينيستر ابايەۆ: «تۇمار» تەلەۆيزيالىق بايگەسى ءۇشىن 214 جۇمىس كەلىپ ءتۇستى
بۇل تۋرالى اقپارات جانە كوممۋنيكاتسيالار ءمينيسترى داۋرەن ابايەۆ فەيسبۋكتەگى ءوزىنىڭ پاراقشاسىندا جازدى، دەپ حابارلايدى قازاقپارات. «قىمباتتى دوستار، 7 -ناۋرىزدا «تۇمار» تەلەۆيزيالىق سىيلىعى ءۇشىن وتىنىشتەر قابىلداۋ اياقتالدى.
بۇعان دەيىن ايتىلعانداي، بۇل جوبانىڭ ماقساتى - جۋرناليستەر قاۋىمىن شىعارماشىلىق ىزدەنىسكە ىنتالاندىرىپ، وسى سالانىڭ دامۋىنا سەرپىن بەرۋ. سونىمەن، 12 اتالىم بويىنشا ەلىمىزدىڭ تۇكپىر- تۇكپىرىنەن بارلىعى 214 جۇمىس كەلىپ ءتۇستى. الداعى ۋاقىتتا بۇل جۇمىستار اقپارات سالاسىنداعى تانىمال تۇلعالاردان قۇرالعان قازىلار القاسىنىڭ ىرىكتەۋىنەن وتەدى»، - دەپ جازدى مينيستر.
داۋرەن ابايەۆتىڭ سوزىنە قاراعاندا، «تۇمار» تەلەۆيزيالىق سىيلىعى ءۇشىن ماراپاتتاۋ ءراسىمى 17 -ناۋرىزعا بەلگىلەنىپ وتىر.
ەسكە سالا كەتەيىك، تەلەۆيزيالىق ونەر سالاسىندا جوعارى جەتىستىكتەرى ءۇشىن بەرىلەتىن «تۇمار» ۇلتتىق تەلەۆيزيالىق جۇلدە تەلەكومپانيالار قىزمەتكەرلەرىنىڭ، شىعارماشىلىق ۇجىمداردىڭ، پروديۋسەرلىك ورتالىقتاردىڭ شىعارماشىلىق الەۋەتىن جۇزەگە اسىرۋعا، قازاقستاننىڭ كوپ ۇلتتى حالقىنىڭ سالتتارىن ساقتاۋ جانە بىرلىگىن قالىپتاستىرۋعا باعىتتالعان. 17 -ناۋرىزدا مەملەكەتتىك ورگانداردىڭ، رەسپۋبليكالىق جانە جەرگىلىكتى تەلەۆيزيالىق ارنالار باسشىلىعى وكىلدەرىنىڭ، شەتەلدىك ساراپشىلاردىڭ، قوعام قايراتكەرلەرىنىڭ، مەديا-تۇلعالاردىڭ جانە قازاقستاندىق ەسترادا جۇلدىزدارىنىڭ قاتىسۋىمەن ماراپاتتاۋ ءراسىمى وتەدى.
اۆتور: قانات مامەتقازى ۇلى
