تۇركيادا جەر سىلكىنىسىنەن كەيىن 212 ساعات وتكەندە 77 جاستاعى اجەي قۇتقارىلدى

استانا. انادولى- قازاقپارات - تۇركيانىڭ ادىيامان پروۆينتسياسىندا جەر سىلكىنىسىنەن كەيىن ارادا 212 ساعات وتكەندە ءۇيىندى استىنان 77 جاستاعى ايەل شىعارىلدى. بۇل تۋرالى قازاقپارات انادولى اقپارات اگەنتتىگىنە سىلتەمە جاساپ حابارلايدى.

فاتما گۋنگەر ەسىمدى كەيۋانا پروۆينتسيا استاناسىندا قۇلاعان عيمارات ۇيىندىلەرى استىنان تابىلعان.

قارت ايەل اۋرۋحاناعا جاتقىزىلدى.

ايەلدىڭ تۋىستارى قۇتقارۋشىلارعا شىن جۇرەكتەن العىسىن ايتتى.

تۇركيادا جويقىن جەر سىلكىنىسى قۇرباندارىنىڭ سانى 35 مىڭنان استى.

ەل پرەزيدەنتى رەجەپ تايىپ ەردوعان تابيعي اپات قۇرباندارىن ەسكە الۋ ءۇشىن جەتى كۇندىك ۇلتتىق ازا تۇتۋ جاريالادى. ەلدىڭ بارلىق اۋماعىندا مەملەكەتتىك تۋ جارتىلاي ءتۇسىرىلدى.

جويقىن جەر سىلكىنىسى كورشىلەس ەلدەردە، سونىڭ ىشىندە سيريا، ليۆان، سولتۇستىك كيپردىڭ تۇرىك رەسپۋبليكاسى، گرەكيا كيپرىندە جانە يراكتا دا سەزىلدى.