س ق و-دا بيىل جانۋارلاردان زارداپ شەككەن 211 ادامنىڭ جارتىسىنان استامىن قاڭعىرعان ءيت قاپقان

پەتروپاۆل. قازاقپارات - سولتۇستىك قازاقستان وبلىسىندا بيىل جانۋارلار قاۋىپ، تىرناعان 211 ادام دارىگەرلەردىڭ كومەگىنە جۇگىندى. ولاردىڭ %56 قاڭعىعان يتتەن زارداپ شەككەن، دەپ حابارلايدى قازاقپارات ءتىلشىسى.

وڭىرلىك كوممۋنيكاتسيالار قىزمەتىندە س ق و سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى اسەت جۇماتايەۆ قۇتىرما اۋرۋىنا قاتىستى وڭىردەگى جاعدايعا توقتالدى. ماماننىڭ ايتۋىنشا، بەلسەندى پروفيلاكتيكالىق جۇمىستىڭ ارقاسىندا بۇل اۋرۋ 1998 -جىلدان بەرى وڭىردە تىركەلمەگەن. الايدا ودان كەلەر قاۋىپ جوق ەمەس.

«س ق و - قۇتىرما اۋرۋىنىڭ تابيعي وشاعى ايماعىندا ورنالاسقان. قىس-كوكتەمدە قاۋىپتى ۆيرۋستى ءيت-مىسىق، اۋىلشارۋاشىلىق جانۋارلارى جابايى جانۋارلاردان جۇقتىرىپ، ەلدى مەكەندەرگە اكەلۋ جانە ادامدارعا جۇقتىرۋ قاۋپى ارتادى.

قۇتىرما - اسا قاۋىپتى، ولىمگە اكەلەتىن اۋرۋ. ەگەر العاشقى ساعاتتاردا جۇقتىرعان ادامعا قاجەتتى كومەك كورسەتىلمەسە، ول ءسوزسىز ولەدى. قۇتىرما - بۇل ەمدەلمەيتىن اۋرۋ، ءولىم تىنىس الۋدىڭ سالدانۋىنان جانە جۇرەك قىزمەتىنىڭ تومەندەۋىنەن بولادى. ادام ساناسىن جوعالتپاي، ازاپتانىپ ولەدى»، - دەيدى اسەت جۇماتايەۆ.

قاۋىپتى اۋرۋ ادامدارعا نەگىزىنەن اۋرۋ جانۋارلار قاپقان كەزدە سىلەكەيىمەن جۇعادى.

«وسى جىلدىڭ 1-توقسانىندا وبلىس بويىنشا 211 ادام انتيرابيالىق كومەككە جۇگىندى، بىلتىر وسى ارالىقتا 176 ادام دارىگەرگە قارالدى.

قاڭعىباس يتتەردىڭ كوبەيۋىنە بايلانىستى ولاردان زارداپ شەككەن تۇرعىنداردىڭ دا قاتارى ارتقان. 119 ادامدى نەمەسە %56,3 ءيت قاۋىپ، تىرناعان. 71 ادام مىسىقتان، سونداي-اق 10 ادام ەگەۋقۇيرىقتان، 4 تۇرعىن ءىرى قارا مالدان، 3 ادام تۇلكىدەن، 2 ادام جىلقىدان زارداپ شەكتى جانە 2 ادامدى ءتيىن تىستەگەن»، - دەيدى باسقارما باسشىسى.

قۇتىرماعا قارسى ەم جوق. اۋرۋدى تەك ۆاكسيناتسيا ارقىلى بولدىرماۋعا بولادى. جانۋارلاردان زارداپ شەككەندەردىڭ بارلىعىنا انتيرابيالىق ەگۋلەر جاسالدى.