21-ساۋىردەن باستاپ «سپۋتنيك V» ۆاكسيناسىن سالدىرعان قازاقستاندىقتاردىڭ ەكپە الۋ ارالىعى وزگەرەدى
وسى قاۋلىعا سايكەس 21-ساۋىردەن باستاپ «سپۋتنيك V» ۆاكسيناسىن سالدىرعان قازاقستاندىقتاردىڭ ەكىنشى دوزانى الۋ ينتەرۆالى وزگەردى.
«ۆاكسيناتسيانى ەكى كەزەڭمەن جۇرگىزەدى: ەڭ الدىمەن 0,5 م ل دوزادا I كومپونەنتپەن، سودان كەيىن ۆاكسيناتسيا كۇنىن ەسەپتەمەگەندە 45 كۇننەن كەيىن - 0,5 م ل دوزادا II كومپونەنتپەن؛ بۇل رەتتە 45-كۇنگە II كومپونەنتپەن ۆاكسيناتسيا جۇرگىزۋ مۇمكىن بولماعان جاعدايدا (دەمالىس، مەرەكە كۇندەرىنە سايكەس كەلۋ، باسقا ەلدى مەكەنگە شىعۋ جانە باسقالار) ۆاكسيناتسيانى 90 كۇن ىشىندە جۇرگىزۋگە جول بەرىلەدى؛ ۆاكسيناتسيانىڭ وسى كۋرسى 2021 -جىلعى 21-ساۋىردەن باستاپ «گام- كوۆيد- ۆاك» ۆاكسيناسىنىڭ ءبىرىنشى كومپونەنتىن العان ادامدارعا ەنگىزىلەدى»، - دەپ جازىلعان قاۋلىدا.
قۇجات 2021 -جىلعى 3-مامىردا ساعات 00-دەن باستاپ كۇشىنە ەندى. ايتا كەتسەك، بيىل ءساۋىر ايىنىڭ سوڭىندا رەسەيدىڭ ن. گامالەي اتىنداعى ەپيدەميولوگيا جانە ميكروبيولوگيا ۇلتتىق زەرتتەۋ ورتالىعىنىڭ ديرەكتورى الەكساندر گينسبۋرگ ۆاكسينالاۋ مەرزىمىنە قاتىستى مالىمدەمە جاسادى. بۇل جايىندا «سپۋتنيكا V Telegram» كانالىندا جاريالاندى.
«ءبىزدىڭ ورتالىقتا دايارلانعان «سپۋتنيك V» ۆاكسيناسىنا توقتالساق، شەتەلدىك سەرىكتەستەردىڭ سۇراۋى بويىنشا ءتيىستى جاۋاپتى جولدايمىز. وسى ورايدا ولاردىڭ ءوتىنىمى بويىنشا شەتەلدىك نارىقتاردا ۆاكسينانىڭ ءبىرىنشى جانە ەكىنشى كومپونەنتتەرىن ەنگىزۋ اراسىنداعى ينتەرۆالدى بۇرىن بەكىتىلگەن ەڭ از ىقتيمال 21 كۇننەن ءۇش ايعا دەيىن ۇلعايتۋعا بولادى دەپ سانايمىز»، - دەدى الەكساندر گينسبۋرگ.
عالىمنىڭ سوزىنە قاراعاندا، ينتەرۆالدى 21 كۇنىننەن 3 ايعا دەيىن ارتتىرۋ ۆاكسينا قالىپتاستىراتىن يممۋندىق جاۋاپتىڭ كۇشىنە اسەر ەتپەيدى، سونداي- اق كەيبىر جاعدايدا ونى ۇزارتۋى دا مۇمكىن.
«مۇنداي پايىمعا ۇقساس ادەنوۆيرۋستىق پلاتفورمادا ۆاكسينالاردى پايدالانۋ تاجىريبەسىنە سۇيەنىپ، سونداي- اق رەسەي مەن شەت مەملەكەتتەردە جاپپاي ۆاكسينالاۋ بويىنشا تابىستى ناۋقاندار نەگىزىندە كەلىپ وتىرمىز»، - دەپ ناقتىلادى پروفەسسور.
بۇل تۇرعىدا ءاربىر ۇلتتىق رەتتەۋشى ءوز ەركىمەن ءبىرىنشى جانە ەكىنشى كومپونەتتەردى ەگۋ اراسىنداعى ينتەرۆالدى 21 كۇن ارالىقتا قالدىرۋ نەمەسە ونى 3 ايعا دەيىن ۇزارتۋ تۋرالى شەشىمدى قابىلداي الادى. الەكساندر گينسبۋرگنىڭ ايتۋىنشا، رەسەي تاراپى ءوز اۋماعىندا ۆاكسينانىڭ ءبىرىنشى جانە ەكىنشى دوزاسى اراسىنداعى ينتەرۆالدى بۇرىنعى مەرزىمدە قالدىرىپ وتىر. وسىنىڭ بارلىعىن ەسكەرە وتىرىپ، جاقىندا ك ۆ ي- عا قارسى ۆاكسيناتسيالاۋ كەستەسىن وزگەرتۋ ماسەلەسى بويىنشا ق ر باس مەملەكەتتىك سانيتاريالىق دارىگەرى ەرلان قياسوۆ تۇسىنىكتەمە بەردى.
«قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرىنىڭ 2021 -جىلعى 30-ساۋىردەگى № 17-قاۋلىسىنا سايكەس «سپۋتنيك V» ۆاكسيناسىمەن ۆاكسيناتسيالاۋ كەستەسىنە وزگەرىستەر ەنگىزىلدى. بۇل رەتتە وسى ۆاكسينانىڭ ءبىرىنشى جانە ەكىنشى كومپونەنتتەرىن ەنگىزۋ اراسىنداعى ينتەرۆال 45 كۇندى قۇراۋى ءتيىس. ەكىنشى كومپونەنتپەن 45-كۇنى ۆاكسيناتسيا جۇرگىزۋ مۇمكىن بولماعان جاعدايدا (دەمالىس، مەرەكە كۇندەرىنە تۇسپا- تۇس كەلۋ، باسقا ەلدى مەكەنگە شىعۋ جانە باسقالارى) ەكپەنى 90 كۇن ىشىندە جۇرگىزۋگە جول بەرىلەدى. ۆاكسيناتسيا كەستەسىنە قاتىستى بۇل ۇستانىم پروفەسسور، رعا اكادەميگى، گامالەي اتىنداعى ەپيدەميولوگيا جانە ميكروبيولوگيا ۇلتتىق زەرتتەۋ ورتالىعىنىڭ ديرەكتورى ا. گينسبۋرگتىڭ 2021 -جىلعى 22-ساۋىردەگى رەسمي مالىمدەمەسىنە نەگىزدەلگەن»، - دەدى ە. قياسوۆ.
اتالعان مالىمدەمەگە سايكەس، «سپۋتنيك V» ۆاكسيناسىنىڭ ءبىرىنشى جانە ەكىنشى كومپونەنتتەرىن ەنگىزۋ اراسىنداعى ينتەرۆالدى ەڭ از ىقتيمال 21 كۇننەن 90 كۇنگە دەيىن ۇلعايتۋعا بولادى جانە ينتەرۆالدى ۇلعايتۋ يممۋندىق جاۋاپتىڭ كۇشىنە اسەر ەتپەيدى. بۇل حالىقتى يممۋنداۋدى ايتارلىقتاي جىلدامداتۋعا مۇمكىندىك بەرەدى. كەيبىر جاعدايلاردا ينتەرۆالدى ۇزارتۋ ادامنىڭ يممۋندىق رەاكسياسىنىڭ كۇشى مەن ۇزاقتىعىنىڭ ارتۋىنا اكەلەدى.
«كوروناۆيرۋس ينفەكسياسىمەن سىرقاتتانۋشىلىق بويىنشا اعىمداعى ەپيدەميولوگيالىق جاعدايدى ەسكەرە وتىرىپ، قازىرگى ۋاقىتتا حالىقتىڭ اناعۇرلىم كوپ مولشەرىن وسى ينفەكسياعا قارسى ۆاكسينانىڭ ءبىرىنشى كومپونەنتىمەن قورعاۋ ماقساتىندا ۆاكسيناتسيا پروتسەسىن جەدەلدەتۋ قاجەتتىلىگى تۋىنداپ وتىر. ۆيرۋستىڭ جاڭا مۋتاتسيالارىنىڭ پايدا بولۋ ىقتيمالدىعىن بارىنشا ازايتۋ ءۇشىن حالىق اراسىندا كوروناۆيرۋستىڭ اينالىمىن ازايتۋعا باعىتتالعان شارالار قابىلدانۋدا. وسىعان بايلانىستى، ۆاكسينانى ازىرلەۋشىنىڭ جوعارىدا كورسەتىلگەن مالىمدەمەسىنىڭ نەگىزىندە قازاقستان رەسپۋبليكاسى دەنساۋلىق ساقتاۋ مينيسترلىگى «سپۋتنيك V» ۆاكسيناسىنىڭ ەكى كومپونەنتىن ەنگىزۋ اراسىنداعى ينتەرۆالدى ۇزارتۋ جانە ءبىرىنشى كومپونەنتتى ەنگىزگەننەن كەيىن 45-كۇنى ەكىنشى كومپونەنتپەن ەگۋ تۋرالى شەشىم قابىلدادى»، - دەپ ءتۇسىندىردى ول.
اۆتور: رۋسلان عابباسوۆ
