وسكەمەندە زاريادتالىپ جاتقان تەلەفوننان ءورت شىعىپ، 20 ادام ەۆاكۋاتسيالاندى

وسكەمەن. قازاقپارات - وسكەمەن قالاسىندا توعىزقاباتتى ۇيدەن ءورت شىعىپ، 20 ادام ەۆاكۋاتسيالاندى، دەپ حابارلايدى قازاقپارات ءتىلشىسى.

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 13-تامىزدا وسكەمەندەگى سلاۆسكي اتىنداعى جاعالاۋ كوشەسىندە ورنالاسقان توعىزقاباتتى ءۇيدىڭ جەتىنشى قاباتىنداعى پاتەردە ءورت شىقتى.

ءورت سوندىرۋشىلەر سول جەرگە شۇعىل كەلىپ جەتتى. پودەز ءىشىن كوك ءتۇتىن باسقاندىقتان 20 ادام، ونىڭ ىشىندە 5 بالا ەۆاكۋاتسيالاندى.

ابىروي بولعاندا، زارداپ شەككەن ەشكىم جوق.

«پاتەردى جالىن شارپىعاندا ىشتە ەشكىم بولماعان. ءورتتىڭ شىعۋىنا - قۋات كوزىنە قوسۋلى قالعان ۇيالى تەلەفون سەبەپ بولدى. كوپ ۇزاماي ت ج د قىزمەتكەرلەرى وتتى تولىقتاي اۋىزدىقتادى»، - دەلىنگەن اقپاراتتا.

ءتىلسىز جاۋدىڭ جالپى اۋدانى 20 شارشى مەتردى قۇرادى. ورتپەن كۇرەسكە جەكە قۇرامنان 18 ادام جانە 6 تەحنيكا جۇمىلدىرىلعان.