تەرەزەدەن سەكىرمەي، 20 سەكۋند كۇتكەندە امان قالار ەدى – ت ج د ءورت كەزىندەگى كىسى ولىمىنە پىكىر ءبىلدىردى

بۇل تۋرالى الماتى قالالىق ت ج د باستىعىنىڭ مىندەتىن اتقارۋشى پولكوۆنيك ەرلان الىبەكوۆ ايتتى، دەپ حابارلايدى قازاقپارات ءتىلشىسى.
«ونىڭ تەرەزەدەن سەكىرگەنى انىقتالدى. الايدا، ءبىزدىڭ بولىمشەلەر ول كەزدە 5- قاباتقا جەتكەن بولاتىن. ەگەر ول شامامەن 20 سەكۋند كۇتكەن جاعدايدا ءبىزدىڭ ءورت سوندىرۋشىلەر ەسىكتى وزدەرى اشىپ، ونى امان الىپ قالار ەدى. ءورت سوندىرۋشىلەر ۇيگە كىرگەن ساتتە ونىڭ اناسىن كورىپ، ونى ەۆاكۋاتسيالادى، ءسويتىپ امان الىپ قالدى. ال اسەل ول كەزدە سەكىرىپ كەتكەن ەدى»، - دەدى ەرلان الىبەكوۆ.
ەسكە سالايىق، ءبىز بۇعان دەيىن الماتىدا 16 قاباتتى ۇيدە ءورت تۇتانعانىن حابارلاعان ەدىك.
قىزىل جالىن ساعات 18:46 كەزىندە وقشاۋلانىپ، ءسوندىرىلدى. 31 ادام، ونىڭ ىشىندە 16 بالا اۋرۋحاناعا جەتكىزىلگەن.
امالى قالماعان تۇرعىندار بالالارىن تەرەزەدەن لاقتىردى. زارداپ شەككەندەردىڭ ىشىندە 2 جۇكتى ايەل بار.
كەيىن الماتى قالالىق دەنساۋلىق ساقتاۋ باسقارماسى ءبىر ادامنىڭ قازا تاپقانىن حابارلادى.
ورتتەن زارداپ شەككەن تۇرعىندار تاماق جانە جاتىن ورىنمەن قامتاماسىز ەتىلدى.
اسەل بەكمۇحامەتوۆانىڭ وتباسىنا قاجەتتى كومەك كورسەتىلەدى. مارقۇمدى جەرلەۋ ءراسىمى الماتى وبلىسى ەڭبەكشىقازاق اۋدانى قاراجوتا اۋىلىندا وتەدى.
الماتى وبلىسىنىڭ اكىمدىگى جەرلەۋ ءراسىمىن ۇيىمداستىرۋعا، مارقۇمنىڭ دەنەسىن تاسىمالداۋعا جاردەم بەرەدى.