بيىل «قورعاس» پورتىنان كۇن سايىن 20 دان استام پويىز جونەلتىلۋدە
اقساي قازاق اۆتونوميالى اۋدانىندا ءدۇبىرلى بايگە ءوتتى - People.cn
قىتايدىڭ گانسۋ ولكەسى اقساي اۋدانىندا ءدۇبىرلى بايگە ءوتتى، دەپ حابارلايدى قىتايدىڭ «People.cn» اقپارات پورتالى.
ب ا ق مالىمەتىنشە، 30-ساۋىردە گانسۋ ولكەسى جيۋجيۋان قالاسى اقساي قازاق اۆتونوميالى اۋدانى 2023 -جىلعى اقساي اۋدانىنىڭ بايگە جارمەنكەسى جانە تاعام مەرەكەسى سىندى ءبىرقاتار ءىس-شارا وتكىزىپ، 1-مامىر - ەڭبەكشىلەر مەرەكەسىن اتاپ وتكەن.
قازاق پەن تۇركيا اۆياتسياسىنداعى ىنتىماقتاستىق - «TRT»
قازاقستان پرەمەر-ءمينيسترى ءاليحان سمايىلوۆ پەن تۇركيانىڭ «TAV Airports» حولدينگىنىڭ پرەزيدەنتى سەركان كاپتان كەزدەستى. تاراپتار اۆياتسيا سالاسىنداعى ىنتىماقتاستىق جانە قازاقستاننىڭ كولىك- لوگيستيكا الەۋەتىن دامىتۋ ماسەلەلەرىن تالقىلادى، دەپ حابارلادى تۇركيا راديو تەلەۆيزيا پورتالى.
تۇركيالىق ب ا ق-تىڭ كەلتىرگەن مالىمەتىنە سۇيەنسەك، ءاليحان سمايىلوۆ تۇركيا قازاقستاننىڭ ساۋدا- ەكونوميكا، ينۆەستيتسيا، سونداي-اق كولىك سالاسىنداعى نەگىزگى سەرىكتەستەرىنىڭ ءبىرى ەكەنىن اتاپ وتكەن. قازاقستان پرەمەرىنىڭ ايتۋىنشا، ەلىمىزدىڭ كولىك- لوگيستيكالىق الەۋەتىن ارتتىرۋعا ۇلكەن كوڭىل ءبولىنىپ وتىر. بۇگىندە ۇكىمەت الدىندا قازاقستاننىڭ سەنىمدى كونتينەنتتىك ترانزيتتىك حاب رەتىندەگى ءرولىن كۇشەيتۋ مىندەتى تۇر.
پرەمەر-مينيستر «TAV Airports» حولدينگىنىڭ الماتىداعى جاڭا حالىقارالىق تەرمينال قۇرىلىسى بويىنشا ءىرى ينفراقۇرىلىمدىق جوباعا قاتىسۋىنىڭ ماڭىزىن اتاپ وتكەن.
ال سەركان كاپتان بولسا كومپانيانىڭ قازاقستانداعى قىزمەتى مەن وندىرىستىك ماسەلەلەرى جايلى، سونىمەن قاتار ەلدەگى باسقا دا اۆياتسيا جوبالارىنا قاتىسۋ جوسپارى تۋرالى ايتقان.
سونداي-اق وسى اپتادا «TRT»-دا «تاريحي جادىگەر قايتارىلدى» دەگەن تاقىرىپتا اقپارات جاريالاندى.
تۇركيالىق باسىلىمنىڭ دەرەگىنشە، 1800 جىلدىق تاريحى بار قۇلپىتاس تۇركيانىڭ يتالياداعى وكىلەتتى ەلشىلىگىنە تاپسىرىلعان.
ماڭىزدى عىلىمي دەرەكتەرگە يە قۇلپىتاستى يتاليادان قابىلداپ العاندارىن بىلدىرگەن مينيستر: «مينيسترلىك قىزمەتىن باستاعانىمدا قايتارىپ العان العاشقى جادىگەر گازيانتەپ زەۋگمادان ەدى. بۇگىن وسى ەجەلگى قالامىز تاريحي ءبىر بولشەگىنە قايتا قاۋىشتى. تاريحي جادىگەرلەردىڭ زاڭسىز ساۋداسىمەن كۇرەس جالعاسادى»، - دەدى.
ق ر قورعانىس ءمينيسترى يراننىڭ ايماقتاعى بەيبىتشىلىك پەن تۇراقتىلىق ءۇشىن كۇش-جىگەرىن جوعارى باعالادى - Parstoday
يران مەن قازاقستاننىڭ قورعانىس مينيسترلەرى شانحاي ىنتىماقتاستىعى ۇيىمىنا (ش ى ۇ) مۇشە ەلدەر قورعانىس مينيسترلەرىنىڭ وتىرىسى اياسىندا كەزدەسىپ، ءوزارا پىكىر الماستى، دەپ حابارلايدى «Parstoday» اقپارات اگەنتتىگى.
ءمالىم ەتىلگەندەي، يراننىڭ قورعانىس ءمينيسترى مۇحاممادرەزا اشتياني قازاقستاندى ورتالىق ازياداعى تاۋەلسىز ءارى ىقپالدى ەل دەپ اتاعان.
ونىڭ ايتۋىنشا، ازيا ەلدەرىنىڭ قاۋىپسىزدىگى ءبىر-بىرىمەن تىعىز بايلانىستى. يران مەن قازاقستان اراسىنداعى قارىم-قاتىناس پەن قورعانىس سالاسىنداعى ىنتىماقتاستىقتى ارتتىرۋ ەكى ەلدىڭ جانە ايماقتىڭ قاۋىپسىزدىگىن نىعايتۋعا ىقپال ەتەدى.
يراندىق باسىلىمنىڭ كەلتىرگەن دەرەگىنە سۇيەنسەك، وسى كەزدەسۋدىڭ جالعاسىندا قازاقستان قورعانىس ءمينيسترى يسلام رەسپۋبليكاسىنىڭ ش ى ۇ-داعى رولىنە توقتالىپ، قورعانىس مينيسترلىگىنىڭ ايماقتاعى بەيبىتشىلىك پەن تۇراقتىلىق باعىتىندا قورعانىس ديپلوماتياسىنداعى كۇش- جىگەرىن جوعارى باعالاعان.
كەزدەسۋ سوڭىندا ەكى ەلدىڭ قورعانىس مينيسترلەرى ىنتىماقتاستىقتى نىعايتۋ جانە ىنتىماقتاستىق دەڭگەيىن ارتتىرۋ، ەكى جاقتىڭ ستراتەگيالىق مۇمكىندىكتەرىن پايدالانۋ ءۇشىن يران مەن قازاقستانداعى كەزدەسۋلەردى جالعاستىرۋ قاجەتتىگىن قۋاتتاعان.
بيىل «قورعاس» پورتىنان كۇن سايىن 20 دان استام پويىز جونەلتىلۋدە - «حالىق» گازەتى
بيىل شينجاڭنىڭ «قورعاس» پورتىنان كۇن سايىن 20 دان استام قىتاي- ەۋروپا پويىزى جونەلتىلىپ جاتىر، دەپ حابارلايدى «حالىق» گازەتى.
اتالعان باسىلىمنىڭ دەرەگىنشە، «قورعاس» تەمىرجول پورتىنىڭ ستاتيستيكاسى بيىلعى 30-ساۋىردەگى جاعداي بويىنشا، «قورعاس» تەمىرجول پورتى ارقىلى كىرىپ- شىعاتىن قىتاي- ەۋروپا پويىزدارىنىڭ سانى 2485 كە جەتكەنىن كورسەتتى. كورسەتكىش وتكەن جىلدىڭ سايكەس كەزەڭىمەن سالىستىرعاندا %14,8 وسكەن. كۇن سايىن 20 دان استام پويىزدىڭ ءوتۋى اتالعان كەدەن بەكەتىندەگى جۇك كولەمىن 3,19 ميلليون تونناعا ۇلعايتقان. قازىر شەكارادان وتەتىن پويىزداردىڭ سانى مەن جۇك كولەمى دە ارتۋدا.
تاشكەنتتە قازاق سۋرەتشىلەرىنىڭ «ءتۇرلى- ءتۇستى جاڭبىر» اتتى سۋرەتتەر كورمەسى وتۋدە - «ءوز ا»
تاشكەنت فوتوسۋرەتتەر ۇيىندە قازاق سۋرەتشىلەرىنىڭ «ءتۇرلى- ءتۇستى جاڭبىر» اتتى تاقىرىبىندا كەسكىندەمە جانە گرافيكا سىزبالارىنىڭ كورمەسى وتۋدە. ايتۋلى شارا وزبەكستان ونەر اكادەمياسى، تاشكەنت فوتوسۋرەتتەر ءۇيى جانە قازاقستان سۋرەتشىلەر قاۋىمداستىعىمەن بىرلەسىپ ۇيىمداستىرىلعان. بۇل تۋرالى وتكەن اپتادا «ءوز ا» اقپاراتتىق اگەنتتىگى حابارلادى.
وزبەكستاندىق باسىلىمنىڭ مالىمەتىنشە، كەيىنگى ۋاقىتتا وزبەكستان مەن قازاقستاننىڭ مادەني- ءبىلىم سالاسىنداعى ىنتىماقتاستىعى بارعان سايىن دامىپ كەلەدى. بۇل ءوز كەزەگىندە ءتۇرلى شىعارماشىلىق جوبالاردى جۇزەگە اسىرۋعا كەڭ مۇمكىندىكتەر اشادى. «ءتۇرلى- ءتۇستى جاڭبىر» تاقىرىبىنداعى قازاق ونەر مەكتەبى وكىلدەرىنىڭ كورمەسى سونىڭ ايعاعى.
ايتا كەتۋ كەرەك، كورمەگە ارانشى شارجانوۆ، سۇلتان ىليايەۆ، ناسىر رۇستەموۆ، مۇحتار بەكەنوۆ، ءمادينا مۇحتاروۆا سىندى قىلقالام شەبەرلەرىنىڭ تۋىندىلارى قويىلعان.
توقايەۆ ديڭ ليرىندى قىتاي تىلىندە قۇتتىقتادى - CNR
«قازاقستان پرەزيدەنتى قىتاي شاحماتشىسى ديڭ ليرىندى قىتاي تىلىندە قۇتتىقتادى» - وسىنداي تاقىرىپپەن بىرنەشە قىتايلىق باسىلىم اقپارات جاريالاعان بولاتىن.
قازاقستان پرەزيدەنتى قاسىم-جومارت توقايەۆ 2-مامىر كۇنى كلاسسيكالىق شاحماتتان الەم چەمپيونى اتاعى ءۇشىن سايىسقا تۇسكەن قىتايلىق ديڭ ليرىن مەن ونىڭ قارسىلاسى - رەسەيلىك يان نەپومنياشيدى قابىلدادى.
قىتايلىق kazakcnr.com سايتىنىڭ جازۋىنشا، ق. توقايەۆ شاحماتتان الەم چەمپيونى اتانعان قىتاي سپورتشىسىن ونىڭ انا تىلىندە قۇتتىقتاعان.
«كەزىندە بەيجىڭ ءتىل ۋنيۆەرسيتەتىندە وقىعان، قىتايدا سەگىز جىلعا جۋىق قىزمەت ىستەگەن، قىتاي تىلىندە ەركىن سويلەيتىن توقايەۆ كەزدەسۋدە ارنايى ديڭ ليرىنگە قىتاي تىلىندە قۇتتى بولسىن ايتتى. ديڭ ليرىن توقايەۆتىڭ كەزدەسۋگە شاقىرۋى زور مارتەبە ەكەنىن جانە وسى تۋرنيرگە قاتىسىپ، جەڭىسكە جەتكەنى ءۇشىن قۋانىشتى ەكەنىن جەتكىزدى»، - دەپ جازادى قىتايدىڭ «ورتالىق حالىق راديوسى».
ايتا كەتەيىك، قازاقستان پرەزيدەنتى قاسىم-جومارت توقايەۆ 2-مامىردا اقوردادا شاحمات فەدەراتسياسىنىڭ (ف ي د ە) ءتوراعاسى اركادي دۆوركوۆيچتى، شاحمات بويىنشا گروسسمەيستەر يان نەپومنياشي مەن ديڭ ليرىندى قابىلداعان بولاتىن.
اۆتور:
بەيسەن سۇلتان ۇلى
