ۇ ق ش ۇ بىرىككەن شتابى 20 جىلدىق مەرەيتويىن اتاپ ءوتتى
ۇيىمنىڭ اسكەري قۇرامداس بولىگىنە قاتىستى قىزمەتتىڭ نەگىزگى ناتيجەلەرى تۋرالى ۇ ق ش ۇ بىرىككەن شتابىنىڭ باستىعى، گەنەرال-پولكوۆنيك اناتولي سيدوروۆ بايانداما جاسادى.
ول بىرىككەن شتابقا اسكەرلەردى (ۇجىمدىق كۇشتەردى) قولدانۋعا، ۇ ق ش ۇ ەلدەرىنىڭ جەدەل جانە جاۋىنگەرلىك دايارلىقتىڭ بىرلەسكەن ءىس-شارالارىن وتكىزۋىنە، اسكەري-تەحنيكالىق ىنتىماقتاستىققا، قارۋلى كۇشتەر ءۇشىن كادرلاردى بىرلەسكەن دايارلاۋدى ۇيلەستىرۋگە بايلانىستى مىندەتتەر جۇكتەلەتىنىن ەسكە سالدى. بۇدان باسقا، ۇ ق ش ۇ بىرىككەن شتابى داعدارىسقا قارسى ارەكەت ەتۋ ورتالىعىنىڭ جۇمىسىن ۇيىمداستىرادى.
«ۇ ق ش ۇ بىرىككەن شتابى قىزمەتىندەگى نەگىزگى كۇش-جىگەر ۇ ق ش ۇ- عا مۇشە مەملەكەتتەر باسشىلارىنىڭ، قورعانىس ۆەدومستۆولارى باسشىلارىنىڭ ۇيىمنىڭ اسكەري قۇرامداس بولىگىن دامىتۋ جونىندەگى شەشىمدەرىنىڭ ورىندالۋىن ۇيىمداستىرۋعا باعىتتالعان»، - دەپ اتاپ ءوتتى ا. سيدوروۆ.
«ۇجىمدىق قاۋىپسىزدىككە سىن- تەگەۋرىن مەن قاۋىپ-قاتەرلەردىڭ ارتۋىنىڭ قازىرگى جاعدايىندا جانە الىس بولاشاقتا بىرىككەن شتاب ۇيىمنىڭ ىقتيمال داعدارىستى جاعدايلارعا پارمەندى ءارى ءتيىمدى ارەكەت ەتۋگە دايىندىعىن قامتاماسىز ەتۋ ءۇشىن بارلىق كۇش-جىگەرىن جۇمسايدى. اسكەرلەردى، ۇجىمدىق كۇشتەردى دامىتۋ جانە ۇيىمعا مۇشە مەملەكەتتەردىڭ ەگەمەندىگى مەن اۋماقتىق تۇتاستىعىن قامتاماسىز ەتۋ جونىندەگى مىندەتتەردى شەشۋدى جالعاستىرادى»، - دەدى شتاب باستىعى.
ۇ ق ش ۇ باس حاتشىسى يمانعالي تاسماعامبەتوۆ بىرىككەن شتاب قۇرىلعان ساتتەن باستاپ 20 جىل ىشىندە ۇجىمدىق قاۋىپسىزدىك، ۇجىمدىق كۇش اسكەرلەرى مەن ۇيىمنىڭ بىرلەسكەن اسكەري جۇيەلەرى، بىرلەسكەن دايىندىق، جوسپارلاۋ جانە قولدانۋ جۇيەسى قۇرىلعانىن، اسكەرلەردى جان-جاقتى قامتاماسىز ەتۋ ءتارتىبى بەلگىلەنگەنىن اتاپ ءوتتى.
«بۇگىندە ۇ ق ش ۇ- نىڭ بىرىككەن شتابى قيىن جاعدايدا جۇمىس ىستەيدى. حالىقارالىق قاتىناستار تەرەڭ وزگەرىستى باستان كەشىرىپ وتىر. ونداعان جىلدار بويى قالىپتاسقان الەمدىك ءتارتىپ نەگىزدەرى وزگەرىپ جاتىر. الەمدىك ساياساتتىڭ نەگىزگى سالالارىندا جالپىعا بىردەي جانە وڭىرلىك قاۋىپسىزدىك يمپەراتيۆتەرىنە نۇقسان كەلتىرە وتىرىپ، ءوز مۇددەلەرىن قامتاماسىز ەتۋگە ۇمتىلۋ بايقالادى»، - دەدى ي. تاسماعامبەتوۆ.
سالتاناتتى كەزدەسۋ اياسىندا ۇ ق ش ۇ- عا مۇشە مەملەكەتتەر وكىلدەرى بىرىككەن شتابتىڭ 20 جىلدىعىنا ارنالعان مەرەيتويلىق مەدالمەن جانە ۇلتتىق قورعانىس مينيسترلىكتەرىنىڭ ۆەدومستۆولىق ناگرادالارىمەن ماراپاتتالدى.
ەسكە سالساق، ۇجىمدىق قاۋىپسىزدىك تۋرالى شارت ۇيىمىنىڭ بىرىككەن شتابىندا 2023-جىلى ۇيىم اسكەرلەرىنىڭ (ۇجىمدىق كۇشتەردىڭ) بىرلەسكەن وقۋ-جاتتىعۋلارىن ۇيىمداستىرۋ جانە اتقارۋ بويىنشا العاشقى كەلىسسوزدەر وتكەن بولاتىن.
