يراكتا زاڭسىز جۇمىس ىستەگەن 20 قازاقستان ازاماتى ۇستالدى
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
«بيىل ناۋرىز ايىنىڭ سوڭىندا يراك رەسپۋبليكاسىنىڭ قۇقىق قورعاۋ ورگاندارى زاڭسىز ەڭبەك قىزمەتىن جۇزەگە اسىرعانى ءۇشىن قازاقستاننىڭ 20 ازاماتىن ۇستادى. قازاقستاننىڭ يوردانياداعى جانە يراكتاعى ەلشىلىگى جەرگىلىكتى ورگاندارمەن سوت قاراۋىنسىز دەپورتاتسيالاۋ تۋرالى ۋاعدالاستىققا قول جەتكىزدى. قازىر ۇستالعان ازاماتتار ايىپپۇل تولەپ يران اۋماعىنان شىعىپ كەتتى»، - دەدى ايبەك سمادياروۆ مينيسترلىكتە وتكەن باسپا ءسوز ءماسليحاتىندا.
ونىڭ ايتۋىنشا، بۇعان دەيىن دە وسىعان ۇقساس وقيعا بولعان.
«بيىل اقپاندا قازاقستاننىڭ 7 ازاماتى يراك رەسپۋبليكاسىنىڭ شەتەلدىكتەردىڭ بولۋى تۋرالى زاڭىنىڭ نورمالارىن بۇزعانى تۋرالى، اتاپ ايتقاندا، جاسىرىن كازينودا زاڭسىز ەڭبەك ەتكەنى ءۇشىن تەرگەۋگە تارتىلعان بولاتىن. بىزگە ءمالىم بولعانداي، وتكەن جىلدىڭ قاراشا ايىندا ولاردىڭ 5 ەۋى ۇستالىپ، سوت قاراۋىنا دەيىن كەپىلمەن بوساتىلعان. وسىعان قاراماستان جەرلەستەرىمىز يراككا قايتا ورالىپ، ەلدىڭ زاڭناماسىن قايتادان بۇزدى. قازاقستان ەلشىلىگى شۇعىل كومەك كورسەتۋدى ۇيىمداستىرعان. سونداي-اق، سوت جانە پروكۋراتۋرامەن كەلىسسوزدەر وتكىزىلدى»، - دەيدى ول.
سونداي-اق، ا. سمادياروۆ جوعارىدا اتالعان زاڭبۇزۋشىلىق ءۇشىن ءبىر جىلعا دەيىن باس بوستاندىعىنان ايرىلۋى نەمەسە 500 مىڭنان 3 ميلليون يراك دينارىنا دەيىن ايىپپۇل سالىنۋى مۇمكىن.
«اتالعان ازاماتتار يراك رەسپۋبليكاسىنا ءتيىستى قۇجاتسىز جانە زاڭسىز ەڭبەك ەتۋ ماقساتىندا بارعانى بەلگىلى بولدى. وسى ورايدا وتانداستارىمىزدى باسقا ەلدىڭ زاڭناماسىن ساقتاۋعا شاقىرامىز»، - دەيدى س ءى م رەسمي وكىلى.
