رەسپۋبليكالىق «باقىتتى وتباسى» باعدارلاماسىنا 20 ميلليارد تەڭگە بولىنەدى

بۇل تۋرالى ءماجىلىس دەپۋتاتتارىنىڭ ساۋالىنا ق ر پرەمەر-ءمينيسترىنىڭ ءبىرىنشى ورىنباسارى رومان سكلياردىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«قابىلدانعان 2026 -جىلعا دەيىن تۇرعىن ءۇي-كوممۋنالدىق ينفراقۇرىلىمداردى دامىتۋ تۇجىرىمداماسى اياسىندا رەسپۋبليكالىق جانە جەرگىلىكتى بيۋدجەتتەر ەسەبىنەن ازاماتتاردى جالدامالى جانە كرەديتتىك باسپانامەن قامتاماسىز ەتۋ تەتىگى قاراستىرىلعان. بۇل رەتتە 2023 -جىلى «باقىتتى وتباسى» باعدارلاماسىمەن (كوپبالالى وتباسىلارعا، جەتىم بالالارعا، 1, 2-توپتاعى مۇگەدەكتىگى بار ادامدارعا، مۇگەدەك بالانى تاريبەلەپ وتىرعان وتباسىلارعا) جەڭىلدەتىلگەن نەسيە بەرۋ ءۇشىن 20 ميلليارد تەڭگە ءبولۋ جوسپارلانىپ وتىر»، - دەپ اتاپ وتەدى ۇكىمەت باسشىسىنىڭ ءبىرىنشى ورىنباسارى جاۋابىندا.

ونىڭ ايتۋىنشا، 2020-2025 -جىلدارعا ارنالعان «نۇرلى جەر» باعدارلاماسى (باعدارلاما 2022 -جىلدىڭ 23 قىركۇيەگىندەگى ۇكىمەت قاۋلىسىمەن كۇشىن جويدى) اياسىندا كوپبالالى وتباسىلاردى باسپانامەن قامتۋ ءۇشىن 146 ميلليارد تەڭگە بولىنگەن. اتاپ ايتقاندا، 2019 -جىلدان بەرى 23,7 مىڭ كوپبالالى وتباسى تۇرعىن ۇيمەن، ونىڭ ىشىندە 16 مىڭ وتباسى جالدامالى پاتەرمەن، 7,7 مىڭ وتباسى «باقىتتى وتباسى» باعدارلاماسى ارقىلى كرەديتتىك پاتەرمەن قامتاماسىز ەتىلدى.

«بۇعان قوسا، بيىل مەملەكەت باسشىسىنىڭ تاپسىرماسىمەن جالدامالى تۇرعىن ءۇيدىڭ جەكەمەنشىك نارىعىنداعى جالداۋ قۇنىن (50 پايىز) سۋبسيديالاۋ مۇمكىندىگى ۇسىنىلدى. وسى جىلدىڭ 12 جەلتوقسانىنداعى مالىمەتتەرگە سايكەس 7,3 ميلليارد تەڭگەنىڭ 8,1 مىڭ ءوتىنىمى ماقۇلداندى»، - دەدى رومان سكليار.