الماتى جولدارىنا قىس كەزىندە 20 مىڭ تونناعا جۋىق تۇز سەبىلەدى
بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا «الماتى تازالىق» كاسىپورنىنىڭ ديرەكتورى ادىلەت توقتاسىنوۆ ءمالىم ەتتى، دەپ حابارلايدى قازاقپارات ءتىلشىسى.
سپيكەردىڭ سوزىنشە، قىس كەزىندە كاسىپورىن مامانداندىرىلعان 704 تەحنيكانى جۇمىلدىرادى.
«قازىرگى ۋاقىتتا 173 قۇرامالى تازالاۋ ماشيناسىنىڭ 156 سى (%90) جولداردى قىستا كۇتىپ ۇستاۋعا ارنالعان قوندىرمامەن الماستىرىلدى. سونىمەن قاتار، كاسىپورىننىڭ 728 جول جۇمىسشىسى، 272 مەحانيزاتور جانە 398 جۇرگىزۋشى تارتىلادى. جالپى شتات سانى - 1728 ادام. بۇدان بولەك، كۇزگى- قىسقى كەزەڭگە قوسالقى مەردىگەرلەر ەسەبىنەن قالا كوشەلەرىندەگى جاپىراقتار مەن قاردى شىعارۋ ءۇشىن 1000 عا جۋىق جول جۇمىسشىسى جانە 200 گە جۋىق ارنايى تەحنيكا تارتۋ جوسپارلانعان»، - دەدى ول.
«الماتى تازالىق» مەكەمەسىنىڭ ديرەكتورى كاسىپورىننىڭ 7 وندىرىستىك جانە 7 قۇم بازاسى بار ەكەنىن ايتتى.
ولار قاجەتتى ماتەريالدىق- تەحنيكالىق رەسۋرستارمەن جابدىقتالعان.
«كوكتايعاققا قارسى سەبۋ ءۇشىن 15 مىڭ توننا تۇز جانە 38 مىڭ توننا سۇزگى ساتىپ الۋ جوسپارلانعان. ونىڭ ىشىندە 17 مىڭ تونناعا جۋىق تۇز جانە 38 مىڭ توننا تۇز قالدىعى دايىندالدى. قوسالقى مەردىگەرلەر 2124 توننا تۇز، 9700 توننا تۇز قالدىعىن ازىرلەيدى»، - دەدى سپيكەر.
جىل سوڭىنا دەيىن كوممۋنالدىق ينفراقۇرىلىمدى دامىتۋ باسقارماسى 669,3 ميلليون تەڭگەگە 17 تەحنيكا ساتىپ الۋدى جوسپارلاپ وتىر .
«بيىل كاسىپورىن ەسەبىنەن 263,6 ميلليون تەڭگەگە 22 تەحنيكا ساتىپ الىندى. بۇل - تراكتوردىڭ جارتىلاي تىركەمەسى، بيتۋم پەشى جانە تاعى باسقالارى»، - دەدى ادىلەت توقتاسىنوۆ.
