ۋكراينا كەمەجايلارىندا 20 ميلليون تونناداي استىق جينالىپ قالعان

نۇر- سۇلتان. قازاقپارات – قارۋلى قاقتىعىس سالدارىنان ۋكراينا كەمەجايلارىندا شامامەن 20 ميلليون توننا استىق جينالىپ، وزگە مەملەكەتتەرگە تاسىمالدانباي وتىر، دەپ حابارلايدى «حابار 24».

الايدا ۆلاديمير پۋتيننىڭ ايتۋىنشا، ۋكراينالىق استىقتى ەكسپورتتاۋ بويىنشا كەلىسسوزدەردە ىلگەرىلەۋ بار. بۇل تۋرالى ول يران استاناسىندا تۇركيا پرەزيدەنتىمەن وتكەن ەكىجاقتى كەزدەسۋدەن كەيىن مالىمدەدى. رەسەي تارابى كەمەلەردىڭ قارا تەڭىز ارقىلى وتۋىنە كەدەرگى ەتپەيتىنىن جەتكىزدى. الايدا ول ءۇشىن ۋكراينالىقتار سۋ جولدارىن مينادان تازارتۋى ءتيىس. كيەۆ بۇعان كەلىسىپ- اق وتىر. دەگەنمەن كەلىسىمنىڭ بۇزىلماۋىن وزگە ەلدەر قاداعالاسىن دەگەن تالاپ قويدى. بۇل ورايدا تۇركيا قاۋىپسىز ءدالىز قۇرۋعا ءوز كومەگىن ۇسىنعان ەدى.

ايتا كەتكەن ءجون، بۇعان دەيىن رەسەي مەن ۋكراينا استىقتىڭ الەمدىك قاجەتتىلىگىنىڭ ۇشتەن ءبىرىن قامتاماسىز ەتىپ كەلگەن.