اتىراۋدا 20 ادامدى الداعان الاياققا قاتىستى تەرگەۋ ءجۇرىپ جاتىر
كۇدىكتى كەلىسىلگەن سومانىڭ جارتىسىن الدىن الا تولەۋدى ۇسىنىپ، ۇلىنىڭ ەسەپشوتىنا اۋدارتىپ وتىرعان، دەپ حابارلايدى قازاقپارات. وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، اقتوبەلىك ايەل اتىراۋ قالاسىنان ەليتالىق پاتەرلەردى قولايلى باعاعا جالعا بەرەمىن دەپ 20 ادامدى الداعان.
«كۇدىكتى OLX قوسىمشاسى ارقىلى اتىراۋ قالاسىنداعى بىرنەشە شاعىناۋداندا پاتەرلەرى بار ەكەنىنە سەندىرگەن. جالعا بەرىلەتىن پاتەر ءۇشىن كەلىسكەن سومانىڭ 50 پايىزىن الدىن الا تولەۋدى ءوتىنىپ، ۇلىنىڭ جەكە ەسەپشوتىنا اۋدارتىپ وتىرعان. قازىر كريمينالدىق پوليتسيا باسقارماسىنىڭ قىزمەتكەرلەرى كۇدىككە ىلىنگەن 1980 -جىلعى ايەلگە قاتىستى 20 دەرەك دالەلدەدى. الاياققا الدانعانداردىڭ اراسىندا 9 اتىراۋلىق بار. بۇدان بولەك نۇر-سۇلتان، تاراز، الماتى، قاراعاندى، قوستاناي قالاسى مەن شىعىس قازاقستان وبلىسىنىڭ تۇرعىندارىن دا سان سوقتىرعان. وسىعان بايلانىستى 11 دەرەك انىقتالىپ وتىر»، - دەپ حابارلادى دەپارتامەنتتىڭ باسپا ءسوز قىزمەتى. بۇدان بۇرىن 45 ميلليون تەڭگەگە 3 پاتەر الىپ بەرەمىن دەپ الماتى تۇرعىنىن الداعان اتىراۋلىق ايەل ۇستالعان بولاتىن. پوليتسياعا الماتى قالاسىنىڭ 40 جاستاعى تۇرعىنى شاعىم تۇسىرگەن. جابىرلەنۋشىنى 44 جاستاعى ايەل اتىراۋ قالاسىنداعى ەليتالىق ۇيلەردەن ءۇش پاتەر الىپ بەرەمىن دەپ سەندىرگەن. الاياق ءۇش پاتەر ءۇشىن جابىرلەنۋشىنىڭ 45 ميلليون تەڭگەسىن يەمدەنىپ العان. پوليتسيا قىزمەتكەرلەرى جەدەل ىزدەستىرۋ جۇمىستارىن جۇرگىزىپ، الاياقتىقپەن اينالىسقان 44 جاستاعى اتىراۋلىق ايەلدى انىقتادى. كۇدىكتى ۇستالىپ، قاماۋعا الىندى.
