قۋاڭشىلىققا قارسى شارالارعا 20 ميلليارد تەڭگە ءبولىنۋى مۇمكىن
ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ وسىنداي مالىمەت بەردى، دەپ حابارلايدى قازاقپارات ءتىلشىسى.
«سونىمەن قاتار كوكتەمگى دالا جانە ەگىن جيناۋ جۇمىستارىن قارجىلاندىرۋ كولەمىن قوسىمشا 70 ميلليارد تەڭگەگە ۇلعايتىپ، بيۋدجەتتىك كرەديت بەرۋدىڭ جالپى كولەمىن 140 ميلليارد تەڭگەگە جەتكىزۋ ماسەلەسى پىسىقتالۋدا. بۇدان باسقا، 200 مىڭ توننا كولەمىندە جەمدىك استىق قورىن قالىپتاستىرۋ ءۇشىن فورۆاردتىق ساتىپ الۋعا 20 ميلليارد تەڭگە ءبولۋ ماسەلەسى پىسىقتالۋدا، ول 2021 -جىلعى قۇرعاقشىلىق قايتالانعان جاعدايدا، مال مەن قۇس باسىنىڭ ساقتالۋىن قامتاماسىز ەتەدى»، - دەدى مينيستر.
ايتۋىنشا، بيىلعى جالپى ەگىس كولەمى 23,1 ميلليون گەكتارعا جەتىپ وتىر. بۇل 2021 -جىلمەن سالىستىرعاندا 125 مىڭ گەكتارعا كوپ.
«تۇتاستاي العاندا، كوكتەمگى دالا جۇمىستارىنا دايىندىق ماسەلەسى جوسپارلى تۇردە ءجۇرىپ جاتىر جانە مينيسترلىكتىڭ ەرەكشە باقىلاۋىندا»، - دەدى ەربول قاراشوكەيەۆ.
