رەسەي- ۋكراينا قاقتىعىسى: ۇرەي مەن ۇمىتكە تولى 20 كۇن

نۇر-سۇلتان.قازاقپارات - ۋكرايناداعى داعدارىستىڭ اياقتالىپ، جاعدايدىڭ تۇراقتالۋىن كۇتكەن جۇرت ەكى ەل اراسىنداعى كەلىسسوزدەردىڭ وڭ ناتيجە بەرۋىن تاعاتسىزدانا كۇتىپ وتىر.

رەسەي مەن ۋكراينا اراسىنداعى كەلىسسوزدەر جالعاسۋى كەرەك. دۇيسەنبىدە ونلاين فورماتتا ەكى ەل دەلەگاتسيالارى اراسىنداعى كەلىسسوزدەر وتكەنى بەلگىلى. الايدا تاراپتار «تەحنيكالىق ءۇزىلىس» جاريالاپ، ەرتەسىنە قايتا جينالاتىندارىن مالىمدەدى. ۋكراينا پرەزيدەنتى كەڭسەسى باسشىسىنىڭ كەڭەسشىسى ميحايل پودولياكتىڭ ايتۋىنشا، رەسەي فەدەراتسياسى مەن ۋكراينا دەلەگاتسيالارىنىڭ كەلىسسوزدەرىندە سەيسەنبىگە دەيىن تەحنيكالىق ءۇزىلىس جاسالعان.

ۋكراينا پرەزيدەنتى ۆلاديمير زەلەنسكي ەۋروپالىق كوميسسيانىڭ باسشىسى ۋرسۋلا فون دەر ليايەنمەن، پولشا پرەزيدەنتى اندجەي دۋدامەن، ليۋكسەمبۋرگ پرەمەر- ءمينيسترى كساۆە بەتتەلمەن سويلەسكەنىن حابارلادى.

ءوزارا تۇسىنىستىك %100 عا ارتتى. يزرايل پرەمەر- ءمينيسترى (نافتالي) بەننەتپەن دە اڭگىمەلەستىم. بۇل سوعىستى تەزىرەك اياقتاۋ ءۇشىن كەلىسسوزدەر جۇرگىزۋدىڭ ماڭىزدى ءبىر بولىگى بولدى. ءبىزدىڭ دەلەگاتسيا رەسەي تاراپىمەن كەلىسسوزدەردە وسى باعىتتا جۇمىس ىستەدى. ماعان حابارلانعانداي ازىرگە جامان ەمەس، ءبىراق تاعى كورەيىك. ەرتەڭ جالعاسادى»، دەدى ۆ. زەلەنسكي.

پولشا، چەحيا جانە سلوۆەنيا پرەمەر- مينيسترلەرى پرەزيدەنت ۆ. زەلەنسكيمەن كەزدەسۋ ءۇشىن كيەۆكە ساپارعا شىققانى بەلگىلى بولدى. ساپاردى پولشا ۇكىمەتى راستادى، ول ساپاردىڭ ماقساتى «بۇكىل ەۋروپالىق وداقتىڭ ۋكراينانىڭ ەگەمەندىگى مەن تاۋەلسىزدىگىن قولداۋىن راستاۋ» دەپ مالىمدەدى. چەحيا پرەمەر- ءمينيسترى ەۋروپالىق كەڭەستىڭ رەسمي ساپارىنىڭ ماقساتى بوستاندىق پەن تاۋەلسىزدىكتى قولداۋدى راستاۋ ەكەنىن ايتتى.

قىتايدىڭ باس ديپلوماتى كەشەگى ا ق ش شەنەۋنىكتەرىمەن جوعارى دەڭگەيدەگى كەزدەسۋدە ەكى تاراپتى تاعى دا ۇستامدىلىق تانىتۋعا شاقىردى. «بارلىق تاراپ بارىنشا ۇستامدىلىق تانىتۋى كەرەك، بەيبىت تۇرعىنداردى قورعاۋى كەرەك جانە اۋقىمدى گۋمانيتارلىق داعدارىستىڭ الدىن الۋى قاجەت»، دەدى يان تسزەچي.

ول قىتاي بەيبىت كەلىسسوزدەردى ىلگەرىلەتۋگە دايىن ەكەنىن جانە حالىقارالىق قوعامداستىق جاعدايدى تەزىرەك رەتتەۋ ءۇشىن جۇمىلۋى كەرەك دەگەن پىكىر ءبىلدىردى. الايدا ول بارلىق تاراپتىڭ زاڭدى تالابى ەسكەرىلۋى كەرەك دەگەندى قوسا ايتتى.

بۇل ۋاقىتتا ۋكرايناداعى قاقتىعىستار توقتاعان جوق. كيەۆتە ءىرى جارىلىستار ەستىلىپ، تۇرعىن ۇيلەردە ەكى ادام قازا بولعانى حابارلاندى. قاۋىپسىزدىك ءۇشىن ۇزاق كومەندانتتىق ساعات بەيسەنبى كۇنى تاڭەرتەڭگە دەيىن جالعاساتىن بولدى.

ە و رەسەيگە قارسى ءتورتىنشى سانكتسيالار پاكەتىن جاريالادى، بۇل ونىڭ اسكەري قيمىلداردى قارجىلاندىرۋىن تەجەۋ ءۇشىن جاسالعان شارالار ەكەنى ايتىلدى. ۇلى بريتانيا سونىمەن قاتار رەسەيلىك اراق پەن ءساندى تاۋارلارعا قارسى جاڭا شەكتەۋلەردى ەنگىزدى.

رەسەيلىك اقپارات اگەنتتىكتەرى ەلدىڭ قورعانىس مينيسترلىگىنىڭ رەسمي وكىلى يگور كوناشەنكوۆ سەيسەنبىدە رەسەي اسكەرلەرى ۋكراينانىڭ حەرسون وبلىسىنىڭ وڭتۇستىگىندە بۇكىل اۋماقتى تولىق باقىلاۋعا العانىن حابارلادى.

نەمىس سۋپەرماركەتتەرى ۋكرايناداعى داعدارىسقا بايلانىستى ازىق- تۇلىك جەتىسپەۋشىلىگى تۋىنداۋى مۇمكىن دەپ الاڭداپ وتىر. ونىڭ قاتارىندا كۇنباعىس مايى بار. ۋكراينا كۇنباعىس مايىنىڭ الەمدىك نارىعىنىڭ 50 پايىزدان استامىن قامتاماسىز ەتەدى، ال گەرمانيا ونىڭ ەڭ ءىرى يمپورتتاۋشىلارىنىڭ ءبىرى بولىپ تابىلادى.

ا ق ش پرەزيدەنتى دجو بايدەن ناتو وداقتاستارىمەن كەزدەسۋلەر وتكىزۋ ءۇشىن ەۋروپاعا ساپار شەگۋى مۇمكىن ەكەنى ايتىلدى. Reuters اگەنتتىگى ول 23-ناۋرىزدا بريۋسسەلدە باسقا باسشىلارمەن كەزدەسىپ، ودان كەيىن پولشاعا بارۋى مۇمكىن دەلىنگەن حابارلامادا.

ال ۇلى بريتانيا كوشباسشىسى بوريس دجونسون باتىس ەلدەرىن رەسەي مۇنايىنا تاۋەلدىلىكتى ازايتۋعا شاقىردى. ونىڭ مۇناي ءوندىرۋدى ۇلعايتۋ ماسەلەسىنە قاتىستى ساۋد ارابياسىنا ساپارلايتىنى بەلگىلى بولدى.

ۋكراينا ۆيتسە- پرەمەر- ءمينيسترى يرينا ۆەرەشۋك ماريۋپول قالاسىندا قالىپ قويعان بەيبىت تۇرعىندارعا كومەك جەتكىزۋ ءۇشىن تاعى ءبىر رەت ارەكەت جاساپ كورەتىندەرىن ايتتى. وسىعان دەيىن رەسەي اسكەرىنىڭ توقتاۋسىز اتىسىنان گۋمانيتارلىق كومەك تيەلگەن جۇك كولىكتەرى دىتتەگەن جەرىنە جەتە الماعان.

مەرۋەرت بۇركىتباەۆا

egemen.kz