13:24, 01 - قىركۇيەك 2021 | GMT +6
بيۋدجەت سالاسى قىزمەتكەرلەرىنىڭ جالاقىسى جىل سايىن 20 پايىزعا وسەدى - توقايەۆ
نۇر-سۇلتان. قازاقپارات - 2022-2025 -جىلدارى بيۋدجەتتەن قارجىلاندىرىلاتىن سالا قىزمەتكەرلەرىنىڭ جالاقىسى جىل سايىن 20 پايىزعا وسەدى.
بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋى بارىسىندا ايتتى، دەپ حابارلايدى قازاقپارات ءتىلشىسى.
«2020 -جىلدان باستاپ 600 مىڭنان استام پەداگوگ پەن دارىگەردىڭ، الەۋمەتتىك سالا قىزمەتكەرىنىڭ جالاقىسى ءوستى. ءبىراق، بيۋدجەتتەن قارجىلاندىرىلاتىن وزگە سالا ازاماتتارى مۇنان تىس قالدى. بۇلار مۋزەي قىزمەتكەرلەرى، مۇراعاتشىلار، كىتاپحاناشىلار، تەحنيكالىق قىزمەتكەرلەر، قورىقشىلار، كولىك جۇرگىزۋشىلەرى جانە باسقالارى. سوندىقتان 2022 -جىلدان 2025 -جىلعا دەيىن مەملەكەت وسى ساناتتاعى ازاماتتىق قىزمەتكەرلەردىڭ جالاقىسىن جىل سايىن ورتا ەسەپپەن 20 پايىزعا وسىرەتىن بولادى. تۇتاستاي العاندا، تاعى 600 مىڭ وتانداسىمىز بۇل باستامانىڭ يگىلىگىن كورەدى»، - دەدى مەملەكەت باسشىسى.