كوروناۆيرۋس جۇقتىرعان ەلوردالىق ايەلمەن بىرگە ۇشقان 20 جولاۋشى اۋرۋحاناعا جاتقىزىلدى

بۇل تۋرالى نۇر- سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ايتىپ بەردى. «نۇر- سۇلتان قالاسىنا كوروناۆيرۋس جۇقتىرعان ايەلمەن ءبىر ۇشاقتا 90 جولاۋشى ۇشىپ كەلدى. 84 جولاۋشى نۇر- سۇلتان قالاسىندا ءجۇر. ولاردىڭ اراسىندا ءىس ساپارمەن كەلگەن، قىدىرىپ كەلگەن شەتەلدىكتەر دە بار. قالعان التى جولاۋشى ەلىمىزدىڭ باسقا وڭىرلەرىنە شىعىپ كەتكەن. ولارمەن سول وڭىرلەر جۇمىس ىستەۋى ءتيىس» ، - دەدى س. قيسىقوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا. ونىڭ ايتۋىنشا، نۇر- سۇلتانداعى بارلىق 84 جولاۋشىمەن بايلانىس ورناعان. «بارلىق 84 جولاۋشىعا حابارلاسىپ شىقتىق. ولاردىڭ اراسىندا قايتۋ بيلەتى بار رەسەيلىكتەر دە بار. سوعان قاراماستان، بارلىعىن وقشاۋلايمىز. ازىرگە 20 ادام اۋرۋحاناعا جاتقىزىلدى» ، - دەدى باسقارما باسشىسى. بۇعان دەيىن ق ر دەنساۋلىق ساقتاۋ ءمينيسترى ەلجان ءبىرتانوۆ ەلوردادا كوروناۆيرۋس جۇقتىرعان ءۇشىنشى ادامنىڭ انىقتالعانىن حابارلادى. قازاقستاندىق ايەل 12 - ناۋرىز كۇنى ميلان- ماسكەۋ- نۇر- سۇلتان رەيسىنەن ءتۇسىرىلىپ، نۇر- سۇلتان قالاسىنداعى كوپبەيىندى مەديتسينالىق ورتالىقتىڭ كارانتيندىك ستاتسيونارىنا جاتقىزىلعان.